मुंबई : हैदराबादहून कुवैतकडे जाणाऱ्या इंडिगो (IndiGo) एअरलाईन्सच्या एका विमानाला धमकीचा ई-मेल आल्यानंतर मंगळवारी सकाळी मुंबईत तात्काळ इमर्जन्सी लँडिंग करावे लागले. या धमकीमध्ये विमानात 'मानवी बॉम्ब' असल्याची भीती व्यक्त करण्यात आली होती, ज्यामुळे तातडीने सुरक्षा यंत्रणांना सतर्क करण्यात आले. मंगळवारी (०२ डिसेंबर, २०२५) सकाळी इंडिगोच्या एका विमानाने हैदराबादमधील राजीव गांधी आंतरराष्ट्रीय विमानतळावरून (RGIA) कुवैतकडे जाण्यासाठी उड्डाण केले. विमानाने उड्डाण केल्यानंतर काही वेळातच सुरक्षा यंत्रणांना एक धमकीचा ई-मेल प्राप्त झाला. यात विमानात बॉम्ब असल्याची गंभीर धमकी देण्यात आली होती. या माहितीची सत्यता तपासण्यासाठी कोणतीही जोखीम न घेता, एअर ट्रॅफिक कंट्रोल (ATC) ने तात्काळ कार्यवाही करत विमानाला मुंबईच्या दिशेने वळवले आणि इमर्जन्सी लँडिंगसाठी सूचना दिल्या. मुंबईच्या छत्रपती शिवाजी महाराज आंतरराष्ट्रीय विमानतळावर (CSMIA) विमानाचे सुरक्षित लँडिंग करण्यात आले. लँडिंग होताच, विमानाला तत्काळ एअरपोर्टच्या आयसोलेशन बे (Isolation Bay) मध्ये पाठवण्यात आले. विमानातील सर्व प्रवाशांना सुरक्षितपणे बाहेर काढण्यात आले आणि त्यांच्यासाठी पर्यायी प्रवासाची व्यवस्था केली जात आहे. सध्या सुरक्षा यंत्रणा, बॉम्ब निकामी पथक (Bomb Disposal Squad) आणि तपास यंत्रणा विमानाची कसून तपासणी करत आहेत आणि धमकीचा ई-मेल नेमका कुठून आला याचा तपास सुरू आहे. या संवेदनशील घटनेमुळे विमानतळावर काही काळ तणावाचे वातावरण निर्माण झाले होते, मात्र एटीसी आणि सुरक्षा पथकाच्या तत्परतेमुळे मोठे संकट टळले आहे.
मुंबई: राज्यात स्थानिक स्वराज्य संस्थांच्या निवडणूकीच्या पहिल्या टप्प्यातील मतदानाला सुरुवात झाली आहे. नगर परिषद आणि नगर पंचायतीच्या २६४ जागांवर आज ...
'बॉम्ब' धमकी खोटी ठरली? इंडिगो विमानाची कसून तपासणी
सुरक्षित लँडिंगनंतर विमानाला तात्काळ एअरपोर्टच्या आयसोलेशन (वेगळ्या पार्किंग) बे मध्ये नेण्यात आले. बॉम्ब निकामी पथक (Bomb Disposal Squad), सेंट्रल इंडस्ट्रियल सिक्योरिटी फोर्स (CISF), आणि अन्य विशेष सुरक्षा पथकांनी (Security Teams) विमानाची कसून तपासणी सुरू केली. तपास करणाऱ्या वरिष्ठ अधिकाऱ्यांनी दिलेल्या माहितीनुसार, विमानाची प्रारंभिक तपासणी पूर्ण झाली आहे. आतापर्यंत कुठलीही संशयास्पद वस्तू किंवा स्फोटकं (Explosives) सापडलेली नाहीत. धमकीचा ई-मेल खोटा (Hoax) असल्याची शक्यता बळावली असून, सुरक्षा यंत्रणा आता हा ई-मेल पाठवणाऱ्या व्यक्तीचा किंवा गटाचा शोध घेत आहेत. या तपासामुळे प्रवाशांना आणि विमानतळ प्रशासनाला मोठा दिलासा मिळाला आहे. विमानाची संपूर्ण तपासणी झाल्यावर प्रवाशांना त्यांच्या पुढील प्रवासासाठी पर्यायी व्यवस्था केली जाईल.
