बलुचिस्तान : पाकिस्तानच्या बलुचिस्तान प्रांतात अवघ्या २४ तासांत सात स्फोटकांच्या घटनेने प्रदेश हादरून गेला आहे. एकीकडे रेल्वे ट्रॅकवर बॉम्बस्फोट घडवण्यात आला, तर दुसरीकडे पोलिस ठाण्यावर ग्रेनेड हल्ला झाल्याने सुरक्षा यंत्रणेत खळबळ उडाली आहे.
पहिली घटना तुर्बतच्या निवजाद क्षेत्रात घडली. अज्ञात दहशतवाद्यांनी रेल्वे ट्रॅकवर बॉम्ब ठेवून मोठा स्फोट घडवला. या स्फोटात ट्रॅकचे मोठे नुकसान झाले असून रेल्वे वाहतूक विस्कळीत झाली आहे. नुकसानाची पाहणी करण्यासाठी रेल्वे अधिकाऱ्यांना तातडीने पाचारण करण्यात आले.
दुसरी मोठी घटना रात्री उशीरा पंजगुर जिल्ह्यात घडली. येथील पोलिस ठाण्यावर अज्ञात व्यक्तींनी ग्रेनेड फेकून हल्ला केला. अचानक झालेल्या हल्ल्यामुळे परिसरात भीतीचे वातावरण निर्माण झाले. सुदैवाने यात कोणतीही जीवितहानी झाली नाही, मात्र पोलिसांनी तातडीने परिसर सील करून सर्च ऑपरेशन सुरू केले.
या दोन मोठ्या घटनांव्यतिरिक्त इतर भागात पाच लहान-मोठे स्फोट घडल्याची माहिती समोर आली आहे. सलग हल्ल्यांमुळे बलुचिस्तानमध्ये पुन्हा एकदा दहशतवादी कारवायांचे सावट गडद झाले आहे. सुरक्षा दलांनी प्रांतात उच्च सतर्कता जारी केली असून अतिरिक्त फोर्स तैनात करण्यात आला आहे. पाकिस्तान सरकारने या हल्ल्यांचा तीव्र निषेध केला असून दोषींना शोधून कठोर कारवाई करण्याचे आश्वासन दिले आहे. बलुचिस्तानमधील या घटनांनी स्थानिक नागरिकांमध्ये भीतीचं वातावरण निर्माण झालं आहे.
