नवी दिल्ली : पंतप्रधान नरेंद्र मोदी रविवार ३० नोव्हेंबर २०२५ रोजी १२७ व्यांदा 'मन की बात' कार्यक्रमाद्वारे जनतेशी संवाद साधणार आहेत. हा 'मन की बात' कार्यक्रमाचा १२८ वा भाग आहे. हा कार्यक्रम ऑल इंडिया रेडिओ आणि दूरदर्शन नेटवर्क, ऑल इंडिया रेडिओ न्यूज वेबसाइट आणि न्यूजऑनएअर मोबाईल अॅपवर प्रसारित केला जाईल. ऑल इंडिया रेडिओ न्यूज, डीडी न्यूज, पंतप्रधान कार्यालय आणि माहिती आणि प्रसारण मंत्रालयाच्या यूट्यूब चॅनेलवर देखील त्याचे थेट प्रक्षेपण केले जाईल. हिंदी प्रसारणानंतर लगेचच ऑल इंडिया रेडिओ प्रादेशिक भाषांमध्ये देखील कार्यक्रम प्रसारित करेल.
पंतप्रधान मोदींनी १२७ व्या 'मन की बात' कार्यक्रमाद्वारे छठ सण, कोरापूट कॉफी, ऑपरेशन सिंदूर, जीएसटी बचत महोत्सव आणि भारतीय जातीच्या कुत्र्यांसह इतर अनेक विषयांवर जनतेशी संवाद साधला होता. यावेळी पंतप्रधान कोणत्या विषयावर बोलणार याबाबत प्रचंड उत्सुकता आहे.
'मन की बात' हा कार्यक्रम देशाच्या तळागाळातील जनतेपर्यंत पोहोचतो. या कार्यक्रमाद्वारे विकासाकरिता आणि नवनव्या प्रयोगांकरिता देशवासियांना प्रेरित केले जाते. अनेक अभिनव कार्यक्रमांची सुरुवात मोदींनी 'मन की बात'द्वारे जनतेशी संवाद साधत केली आहे. या कार्यक्रमाची सुरुवात २०१४ मध्ये झाली. अनेक सामाजिक, सांस्कृतिक, आर्थिक, राजकीय तसेच क्रीडा आदी विषयांवर पंतप्रधान मोदी 'मन की बात' मधून बोलतात. यामुळेच या कार्यक्रमाला विशेष महत्त्व आहे.
