लखनऊ : तंत्रज्ञानाच्या दुनियेत नेहमी मोठ्या कंपन्यांच्या आणि मोठ्या बजेटवाल्या स्टार्टअप्सच्या नवकल्पनांची चर्चा होते. पण, जिद्द, जिज्ञासा आणि काहीतरी वेगळं करण्याची इच्छा असेल तर वय मधे न येता अद्वितीय यश संपादन करता येते. याचं अगदी आत्ताचं उदाहरण म्हणजे फक्त १७ वर्षांच्या एका इंटर कॉलेजच्या विद्यार्थ्याने असा एक एआय रोबोट तयार केला आहे की, ते पाहून टेक एक्सपर्ट्सनाही आश्चर्य वाटले आहे. हा रोबोट फक्त प्रश्नांची उत्तरेच देत नाही, तर गरज पडल्यास शाळेत शिक्षकाची जागाही घेऊ शकतो.
एलएलएम चिपसेटचा वापर करून उत्तर प्रदेशमधील विद्यार्थ्याने बनवला सोफी नावाचा एक एआय शिक्षक रोबोट! . .#prahaarnewsline #MarathiNews #AIteacher #IndiasfirstAIteacher #UttarPradesh #shivcharanintercollege pic.twitter.com/MaapPdeMWl
— Prahaar Newsline (@PrahaarNewsline) November 29, 2025
उत्तर प्रदेशातील शिवचरण इंटर कॉलेजमध्ये १२वीत शिकणाऱ्या आदित्य कुमार या विद्यार्थ्याने 'सोफी' (Sophie) नावाचा एआय टीचर रोबोट बनवला आहे. हा रोबोट सध्या सोशल मीडियावर प्रचंड व्हायरल होत आहे आणि तो व्हिडिओमध्ये विविध विषयांवरील प्रश्नांची उत्तरे देताना दिसत आहे. एएनआयच्या माहितीनुसार, सोफी एलएलएम चिपसेटवर आधारित आहे, याच तंत्रज्ञानाचा वापर मोठे रोबोटिक्स उत्पादक करतात.
"मी एक एआय टीचर रोबोट आहे..." सोफीने दिली स्वतःची ओळख
एका डेमो व्हिडिओमध्ये जेव्हा या रोबोटला स्वतःबद्दल विचारले गेले, तेव्हा तिने हिंदीमध्ये उत्तर दिले, “मी एक एआय टीचर रोबोट आहे. माझे नाव सोफी आहे आणि माझी निर्मिती आदित्यने केली आहे. मी शिवचरण इंटर कॉलेज, बुलंदशहर येथे शिकवते. होय, मी मुलांना व्यवस्थित शिकवू शकते.” सोफीचा आवाज आणि भाषा पूर्णपणे हिंदीत आहे, ज्यामुळे स्थानिक विद्यार्थ्यांना ती सहजपणे समजू शकते.
आदित्यने सांगितले की, "मी हा रोबोट बनवण्यासाठी एलएलएम चिपसेटचा वापर केला आहे. हीच चिप मोठ्या कंपन्या त्यांच्या रोबोट्समध्ये लावतात. सध्या सोफी फक्त बोलू शकते, पण आम्ही तिला लिहिण्यायोग्य बनवण्यावरही काम करत आहोत." आदित्यने अशी मागणी केली की, प्रत्येक जिल्ह्यात रिसर्च लॅब असावी, जेणेकरून विद्यार्थी त्यांच्या कल्पनांवर काम करू शकतील.
सोफीच्या क्षमता: वर्ग घेते आणि गणिताचे प्रश्नही सोडवते. व्हिडिओमध्ये आदित्यने रोबोटला अनेक प्रकारचे प्रश्न विचारले —जगातील सर्वात उंच इमारत कोणती?भारताचे पहिले राष्ट्रपती कोण?
वीज म्हणजे काय? १०० + ९२ चा प्रश्न. या प्रत्येक प्रश्नाचे सोफीने त्वरित आणि अचूक उत्तर दिले.
............
आदित्य म्हणतो, "जर एखाद्या दिवशी शिक्षक गैरहजर असतील, तर हा रोबोट मुलांना शिकवू शकतो. हा एक 'सब्सिट्यूट टीचर' म्हणून काम करेल." सध्या सोफी फक्त हिंदीत बोलते, पण आदित्य भविष्यात तिला बहुभाषिक (मल्टी-लँग्वेज सपोर्ट) बनवण्याची योजना आखत आहे.) या लहान जिल्ह्यातून आलेल्या या मोठ्या नवकल्पनेसाठी आदित्यने सरकारकडे प्रत्येक जिल्ह्यात संशोधन प्रयोगशाळा (Research Laboratory) उपलब्ध करून देण्याची मागणी केली, जेणेकरून भारतातील हजारो विद्यार्थी नवीन तंत्रज्ञान विकसित करू शकतील.
