महापालिकेने मागवली २६ कोटींची निविदा
मुंबई (खास प्रतिनिधी) : मालाड (पूर्व), येथील माँसाहेब मीनाताई ठाकरे क्रीडांगण, कांदिवली (पूर्व) लोखंडवाला येथील आकुर्ली व्हिलेज येथील साहित्य सम्राट अण्णाभाऊ साठे उद्यान, माटुंगा येथील महेश्वरी उद्यान, परळ येथील दादासाहेब फाळके उद्यान आणि नरे पार्क मैदानाचा नूतनीकरण करत विकास करण्यात येणार आहे. त्यासाठी महापालिकेने २६ कोटींची निविदा मागवली आहे.
मुंबई महापालिकेचे शहर आणि उपनगरे येथे अनेक उद्याने, क्रीडांगणे, मनोरंजन मैदाने आहेत. त्यांचा ठराविक वर्षांनी दुरुस्ती, नूतनीकरण यांच्या माध्यमातून विकास करण्यात येतो. मात्र, विकास केल्यानंतर पुढील तीन ते पाच वर्षे त्याची देखभाल दुरुस्ती करणे हे संबंधित काम करणाऱ्या कंपनीची जबाबदारी असते. मात्र प्रत्यक्षात उद्यानातील पायवाटा, झोपाळे, घसरगुंडी, व्यायाम साहित्य, आदीकडे कंत्राटदाराकडून दुर्लक्ष केला जातो. परिणामी त्या विकसित मैदान आणि उद्यानांची दुरवस्था होते.
आता महापालिकेची निवडणूक तोंडावर असतानाच पालिका प्रशासनाने, मालाड (पूर्व), येथील माँसाहेब मीनाताई ठाकरे क्रीडांगणाची ११ महिन्यात दुरुस्ती करण्यात येणार आहे. त्यासाठी ४ कोटी २२ लाख रुपये खर्चात येणार आहेत. तसेच, कांदिवली (पूर्व) लोखंडवाला येथील आकुर्ली व्हिलेज येथील साहित्य सम्राट अण्णाभाऊ साठे उद्यानाच्या विकासाचे आणि श्रेणीवाढ करण्याचे काम ११ महिन्यात करण्यात येणार असून त्यासाठी महापालिका १४ कोटी ७८ लाख रुपये खर्च करणार आहे. त्याचप्रमाणे, माटुंगा येथील महेश्वरी उद्यानाच्या नूतनीकरणाचे काम आगामी ११ महिन्यात करण्यात येणार असून त्यासाठी महापालिका ३ कोटी ९९ लाख रुपये खर्च करणार आहे. तसेच, परळ येथील दादासाहेब फाळके उद्यान, नरे पार्क मैदानाची दर्जेदार कामे करण्यात येणार आहेत. त्याचप्रमाणे, माटुंगा परिसरातील एम. चंदगडकर वाड्यांचे नूतनीकरण करण्यात येणार आहे. या दोन्ही कामांसाठी ३ कोटी १५ लाख रुपये खर्च करण्यात येणार आहेत. या सर्व उद्याने, क्रीडांगणे, मनोरंजन मैदाने यांच्या विकासकामांसाठी महापालिकेने तब्बल १६ कोटी १५ लाख ३८ हजार रुपयांच्या अंदाजित खर्चाकरता निविदा मागवली आहे.
