मुंबई : देशभरात खळबळ माजवणाऱ्या २५२ कोटी रुपयांच्या मेफेड्रोन (एमडी) प्रकरणात पोलिसांना आणखी एक मोठा धागा मिळाला आहे. मुंबई पोलिसांच्या अंमली पदार्थविरोधी पथकाने या रॅकेटचा पाचवा मुख्य आरोपी मोहम्मद सलीम सुहेल शेखला अटक केली असून, या चौकशीत काही धक्कादायक माहिती उघड झाली आहे. सलीम शेखने भारतात तसेच परदेशात भव्य ड्रग्ज पार्ट्या आयोजित केल्याचे मान्य केले असून, या पार्ट्यांमध्ये मनोरंजन क्षेत्रातील काही प्रसिद्ध व्यक्ती सहभागी झाल्याचा संशय तपास यंत्रणांनी व्यक्त केला आहे. सध्या पोलिस या संपूर्ण नेटवर्कचा विस्तार आणि त्यातील प्रमुख व्यक्तींचा शोध घेत आहेत.
या प्रकरणाचा मुख्य सूत्रधार मानला जाणारा सलीम शेख हा फरार ड्रग्ज डॉन सलीम डोलाचा जवळचा साथीदार असल्याचे समोर आले आहे. पोलिस रिमांड दरम्यान त्याने अनेक दावे केले असून ते रिमांड अहवालातही नमूद आहेत. त्याने भारतात आणि परदेशात अनेक लक्झरी ड्रग्ज पार्ट्या घेतल्याचे कबूल केले आहे. त्यात काही प्रसिद्ध बॉलीवूड कलाकार आणि समाजातील उच्चभ्रू व्यक्ती सहभागी झाल्याचे त्याने सांगितले, मात्र या दाव्यांची सत्यता पोलिस सध्या तपासत आहेत. पोलिसांनी स्पष्ट केले आहे की अद्याप या प्रकरणात कोणालाही दोषी ठरवण्यात आलेले नाही.
फेब्रुवारी २०२४ मध्ये एका महिलेला ७४१ ग्रॅम मेफेड्रोनसह पकडल्याने या संपूर्ण रॅकेटचा पर्दाफाश झाला. तिच्या चौकशीतून सांगलीतील एका केमिकल फॅक्टरीचा धागा मिळाला. त्या ठिकाणी पोलिसांनी छापा टाकून तब्बल १२२.५ किलो ड्रग्ज आणि केमिकल्स जप्त केले, ज्याची किंमत अंदाजे ₹२४५ कोटी इतकी होती. तपासात पुढे अनेक आरोपी परदेशात फरार झाल्याचे उघड झाले. इंटरपोलच्या मदतीने सलीम डोलाचा मुलगा ताहिर डोला आणि त्याचा पुतण्या कुब्बावाला यांना युएईतून अटक करण्यात आली, तर सलीम शेखलाही दुबईतून हद्दपार करून मुंबईत आणण्यात आले आहे.
पोलिसांच्या मते, मोहम्मद सलीम शेख हा या ड्रग्ज नेटवर्कचा समन्वयक होता. महाराष्ट्र, गुजरात, मध्य प्रदेश, राजस्थान आणि तेलंगणा यांसारख्या राज्यांमध्ये या रॅकेटची जाळी पसरलेली होती. या संपूर्ण कारवाईचा सूत्रधार सलीम डोला सध्या तुर्कीमध्ये असल्याचे समजते, तर सलीम शेख हा त्याचा विश्वासू सहकारी मानला जातो.
मुंबई सेंट्रल परिसरातून पोलिसांनी आणखी एक आरोपी शाहरुख मोहम्मद शफी शेख याला अटक केली. त्याच्याकडे जवळपास ९९५ ग्रॅम मेफेड्रोन सापडले, ज्याची बाजारातील किंमत जवळपास ₹२ कोटी इतकी आहे. त्याच्याकडून इलेक्ट्रॉनिक वजन काटा, ₹१.२५ लाख रोख रक्कम, अनेक मोबाईल फोन, पासपोर्ट, ओळखपत्रे आणि इतर कागदपत्रे जप्त करण्यात आली.
तपासात आणखी एक महत्वाचा धागा सापडला, आरोपींनी बनावट कागदपत्रांच्या आधारे पासपोर्ट मिळवून परदेशात पलायन करण्याचा, तसेच परदेशी ड्रग्ज पुरवठादारांशी संपर्क साधण्याचा प्रयत्न केला होता. सलीम शेख आणि शरीब अन्सारी यांनी मुंबईतील पत्त्यांचा वापर करून अनेक तस्करांना फर्जी पासपोर्ट मिळविण्यात मदत केली. सांगली येथील फॅक्टरी हेच या टोळीचे प्रमुख ड्रग्ज उत्पादन केंद्र असल्याचे स्पष्ट झाले असून, येथून संपूर्ण देशभरात एमडी ड्रग्जचा पुरवठा केला जात होता. सलीम शेखच्या सर्व कबुलीजबाबांची आणि त्याने केलेल्या दाव्यांची तपासणी सुरू आहे.
