रस्त्यात तुटलेला पाय, बाजूला साखरेचं पोतं, इंदापूरमध्ये नेमका काय प्रकार?

पुणे: कळंब-निमसाखर मार्गावर एका व्यक्तीचा गुडघ्यापासून तोडलेला पाय सापडल्यामुळे परिसरात खळबळ उडाली आहे. हा प्रकार इंदापूर तालुक्यातील वालचंदनगर हद्दीत राज्यमार्गाच्या साईडपट्टीवर उघडकीस आला. या पार्श्वभूमीवर पोलिसांनी उरलेले शरीर शोधण्यासाठी परिसरात शोधमोहीम सुरू केली असून हा पाय साधारण ४५ ते ५० वयोगटातील पुरुषाचा असण्याची शक्यता वर्तवली जात आहे. तसेच पायात पांढरा सॉक्स होता आणि परिसरात साखरेचे रिकामे पोतेही आढळून आले आहे.

मिळालेल्या माहितीनुसार, बुधवार, १२ नोव्हेंबर रोजी सकाळी सव्वाआठ वाजताच्या सुमारास वालचंदनगर पोलीस स्टेशनला रस्त्यात पाय आढळून आल्याची माहिती देण्यात आली. माहिती मिळताच, वालचंदनगर पोलिसांनी घटनास्थळी धाव घेतली. तिथे त्यांना गुडघ्यापासून तोडलेला पाय दिसला. या तोडलेल्या पायाच्या काही अंतरावर ५० किलो क्षमतेचे साखरेचे रिकामे प्लास्टिक पोते आढळले. या प्रकरणी वालचंदनगर पोलीस स्टेशनचे सहाय्यक पोलीस निरीक्षक राजकुमार डुणगे आणि त्यांच्या सहकाऱ्यांनी तात्काळ प्रकरणाचा तपास करण्यास सुरुवात केली.

पोलिसांनी राज्य मार्गाच्या दोन्ही बाजूला, उसाच्या शेतात, डाळिंब आणि इतर पिकांमध्ये, तसेच गटारींमध्ये आणि नीरा नदीवरील पुलाजवळही शोध घेतला. परंतु, त्यांना अद्याप कोणतेच धागेदोरे मिळालेले नाहीत. या शोधमोहिमेत वालचंदनगर पोलीस स्टेशनचे कर्मचारी, स्थानिक पोलीस पाटील आणि सामाजिक कार्यकर्तेही सहभागी झाले आहेत. बारामती विभागाच्या फॉरेन्सिक लॅबचे कर्मचारीही घटनास्थळी दाखल झाले होते. दरम्यान, जर कोणाला या सावळ्या रंगाच्या वर्णनानुसार काही माहिती मिळाली, तर त्यांनी वालचंदनगर पोलीस स्टेशनशी संपर्क साधावा, असे आवाहन पोलिसांकडून करण्यात आले आहे.