मुंबई: आपल्या फिटनेस आणि सुंदर त्वचेसाठी नेहमी चर्चेत असणारी बॉलिवूड अभिनेत्री भाग्यश्री हिने नुकताच तिच्या चाहत्यांसाठी एक महत्त्वाचा फिटनेस टीप शेअर केला आहे. वजन कमी (Weight Loss) करण्यासाठी आणि पोटावरील चरबी (Belly Fat) कमी करण्यासाठी भाग्यश्रीने 'बुलेटप्रूफ कॉफी' (Bulletproof Coffee) पिण्याची शिफारस केली आहे.
भाग्यश्रीची 'पॉवर कॉफी'
अभिनेत्री भाग्यश्री तिच्या सोशल मीडियावरील 'ट्यूजडे टीप विथ बी' या मालिकेत नियमितपणे फिटनेस आणि आरोग्यविषयक टिप्स देत असते. दिवाळी आणि इतर सणांदरम्यान झालेल्या अति खाण्यापिण्यामुळे वाढलेल्या वजनावर नियंत्रण मिळवण्यासाठी तिने बुलेटप्रूफ कॉफीचा उपाय सांगितला आहे.
भाग्यश्रीच्या मते, सकाळी सर्वात आधी उपाशीपोटी बुलेटप्रूफ कॉफीचे सेवन करणे खूप चांगले आहे. तिने दावा केला आहे की ही कॉफी पिण्याचे अनेक फायदे आहेत. दिवसभर काम करण्यासाठी त्वरित आणि टिकणारी ऊर्जा मिळते. पचनसंस्थेचे आरोग्य सुधारते. मानसिक स्पष्टता आणि स्मरणशक्ती वाढवते. पोट भरल्याची भावना देते, ज्यामुळे भूक नियंत्रित राहते आणि वजन कमी करण्यास मदत करते.
बुलेटप्रूफ कॉफी कशी बनवायची?
भाग्यश्रीने तिच्या चाहत्यांसाठी ही खास कॉफी बनवण्याची सोपी पद्धत देखील सांगितली आहे:
एका कपात गरम पाणी घ्या.
त्यात एक चमचा कॉफी पावडर (Coffee Powder) घाला.
आता त्यात एक चमचा शुद्ध साजूक तूप (A2 Cow Ghee) किंवा ग्रास-फेड बटर (Grass-fed Butter) घाला.
हे सर्व मिश्रण एकत्र करून तुमची बुलेटप्रूफ कॉफी तयार करा.
बुलेटप्रूफ कॉफी म्हणजे काय?
बुलेटप्रूफ कॉफी हे एक उच्च-फॅट आणि कमी-कार्ब पेय आहे. ही कॉफी साधारणपणे ब्लॅक कॉफी, ग्रास-फेड (Grass-fed) अनसॉल्टेड बटर आणि एमसीटी (MCT - Medium-Chain Triglyceride) तेल एकत्र करून बनवली जाते.
