मुंबई: अल्पवयीन मुलींशी गैरवर्तन केल्याच्या गंभीर आरोपाखाली मुंबई पोलिसांनी शिवडी येथील एका धार्मिक संस्थेतून एका ३५ वर्षीय अरबी भाषेच्या शिक्षकाला ताब्यात घेतले आहे. १२ ते १४ वयोगटातील मुली या संस्थेत शिकायला येत होत्या आणि आरोपी तिथेच राहायचा. पुढील चौकशीसाठी त्याला दोन दिवसांची पोलीस कोठडी सुनावण्यात आली आहे.
या घटनेची सुरुवात २९ ऑक्टोबर रोजी झाली, जेव्हा एका पिडितेच्या आईने शिवडी पोलीस ठाण्यात धाव घेतली. तिने तक्रार केली की, तिच्या १४ वर्षीय मुलीसोबत अरबी शिकवताना शिक्षकाने अयोग्य वर्तन केले. पीडितेच्या सविस्तर निवेदनातून समोर आले की, आरोपी मार्च २०२४ ते ऑक्टोबर २०२५ या कालावधीत अश्लील हावभाव करत असे, मुलीला अयोग्यरित्या स्पर्श करत असे आणि शिकवताना मोबाईलवर अश्लील व्हिडीओ दाखवत असे.
पोलिसांनी केलेल्या पुढील चौकशीत असे दिसून आले की, आरोपीने १२ वर्षीय मुलगी आणि त्याच बॅचमधील इतर दोन विद्यार्थिनींसोबतही असेच अयोग्य वर्तन केले होते. तक्रार आणि पुराव्यांनंतर शिवडी पोलिसांनी तातडीने गुन्हा दाखल केला आणि विशेष पथक तयार करून आरोपीला संस्थेतून अटक केली.
पोलिसांनी आरोपीचा मोबाईल फोन जप्त केला असून तो फॉरेन्सिक विभागाकडे तपासणीसाठी पाठवला आहे, जेणेकरून त्यात कोणत्याही आक्षेपार्ह सामग्रीचा किंवा संवादाचा पुरावा आहे का, हे तपासता येईल.
