बंगळुरू : कर्नाटकमध्ये बंगळुरू येथे एक धक्कादायक घटना घडली. रस्त्यावरुन वेगाने जात असलेल्या एका कारला एका बाईकने धडक दिली. धडक देणाऱ्या बाईकवर दोन जण बसले होते. अपघात झाल्याचे लक्षात येताच बाईकवर बसलेले दोघेजण घटनास्थळावरुन बाईकसह वेगाने पसार झाले. या प्रकारामुळे कारचालक आणि त्याची पत्नी संतापली. यानंतर जोडप्याने भरधाव वेगाने कार चालवत बाईकवरुन पसार झालेल्यांना शोधले आणि त्यांचा वेगाने पाठलाग सुरू केला. तब्बल दोन किमी. पर्यंत पाठलाग केल्यानंतर कारने बाईकला जोरदार धडक दिली. यानंतर कार घटनास्थळावरुन सुसाट वेगाने निघून गेली. या घटनेत बाईकस्वाराचा मृत्यू झाला आणि बाईकवर मागे बसलेली व्यक्ती जखमी झाली. पोलीस या प्रकरणी पुढील तपास करत आहेत.
बाईकला धडक मारुन पसार झालेल्या कारचा पोलिसांनी शोध घेतला. यानंतर पोलिसांनी बाईकला धडक मारल्याप्रकरणी मनोज कुमार आणि त्याची पत्नी आरती शर्मा या दोघांना अटक केली. मनोज आणि आरती ज्या कारमध्ये बसले होते त्याच कारने बाईकला धडक दिली. यानंतर कार पसार झाली. अपघातात बाईकस्वार दर्शनचा मृत्यू झाला आणि बाईकवर मागे बसलेला वरुण जखमी झाला. ही घटना २५ ऑक्टोबर रोजी रात्री ११:३० वाजता श्रीराम लेआउटजवळ घडली, असे पोलिसांनी सांगितले. या प्रकरणात जप्त केलेल्या सीसीटीव्ही फूटेजच्या मदतीने पोलिसांनी कारवाई सुरू केली आहे.
कारचा साइड मिरर बाईकला धडकल्याने बाईकस्वार आणि कार चालक यांच्यात किरकोळ वाद झाला. यानंतर बाईकस्वार दर्शन घटनास्थळावरुन निघून गेला. पण कार चालकाने बाईकचा पाठलाग केला आणि एका टप्प्यावर बाईकला जोराची धडक दिली. या अपघातात बाईकवर बसलेले दोघे रस्त्यावर जोरात फेकले गेले. रस्त्यावर जोरात पडल्यामुळे बाईकस्वार दर्शनचा मृत्यू झाला आणि बाईकवर मागे बसलेला वरुण जखमी झाला. बाईकला जोरदार धडक दिल्यानंतर मनोज कार घेऊन वेगाने पसार झाला होता.
सीसीटीव्ही फूटेज बघितल्यावर पोलिसांना एक धक्कादायक प्रकार समजला. कारमधील जोडप्याला पहिल्या प्रयत्नात दुचाकीस्वार दिसले नाहीत. त्यांनी यू-टर्न घेतला आणि नंतर त्यांना पुन्हा धडक दिली. गुन्हा केल्यानंतर, ते घटनास्थळावरून पळून गेले. शिवाय, ते नंतर मास्क घालून परतले, घटनास्थळावरून तुटलेले कारचे भाग उचलले आणि पुन्हा पळून गेले होते. या प्रकरणात पुढील पोलीस कारवाई सुरू आहे.