मुंबई : त्वचेचं सौंदर्य फक्त बाहेरून लावल्या जाणाऱ्या क्रीम्स, फेस मास्क किंवा लोशन्सवर अवलंबून नसतं. यामागे खरा आधार असतो आपल्या आहाराचा. आपण रोज काय खातो आणि आपल्या शरीरात कोणते पोषक घटक पोहोचतात, यावर त्वचेचं आरोग्य मोठ्या प्रमाणात अवलंबून असतं.
जर तुम्हाला नैसर्गिकरित्या त्वचा सुंदर, कोमल आणि तरुण ठेवायची असेल, तर फक्त बाह्य उपचार नव्हे, तर योग्य आहार घेणे अत्यंत महत्त्वाचे ठरते. शरीरात योग्य पोषण मिळालं तर त्वचा आतून आरोग्यपूर्ण राहते आणि चेहऱ्यावर तेज दिसून येतो. यासाठी काही विशिष्ट खाद्यपदार्थ तुमच्या रोजच्या आहारात असायलाच हवेत.
चला तर पाहूया, असे कोणते ८ सुपरफूड्स आहेत जे तुमच्या त्वचेला दीर्घकाळ तरुण आणि तजेलदार ठेवू शकतात:
१) डार्क चॉकलेट
कोकोने भरलेले डार्क चॉकलेट केवळ चवीलाच भारी नाही तर त्वचेसाठीही फायद्याचं ठरतं. यामध्ये कोको फ्लेव्हॅनॉल्स असतात, जे एक प्रकारचे अँटिऑक्सिडंट आहेत. हे त्वचेला UV किरणांपासून संरक्षण देतात, रक्ताभिसरण वाढवतात आणि त्वचा मऊ ठेवतात. ७०% किंवा त्याहून अधिक कोको असलेले डार्क चॉकलेट निवडा.
२) टोमॅटो
टोमॅटोमध्ये भरपूर प्रमाणात लाइकोपीन नावाचा अँटिऑक्सिडंट असतो, जो त्वचेला सूर्यकिरणांपासून संरक्षण देतो आणि त्वचेला चमक देतो. विशेष म्हणजे, टोमॅटो शिजवल्यावर त्यातील लाइकोपीन अधिक प्रभावी होतो. त्यामुळे टोमॅटो रस किंवा भाजी रूपात नियमित खाणं फायदेशीर.
३) डाळिंब
डाळिंबामध्ये अँथोसायनिन्स, इलॅजिक अ‍ॅसिड आणि अँटीऑक्सिडंट्स असतात जे त्वचेवर होणारे वृद्धत्वाचे परिणाम कमी करतात. डाळिंब सॅलड, ज्यूस किंवा फळ म्हणून घेतल्यास त्वचेला नैसर्गिक उजळपणा मिळतो.
४) सिमला मिर्ची
सिमला मिर्ची ही व्हिटॅमिन C चा उत्तम स्रोत आहे. हे व्हिटॅमिन कोलेजन तयार करण्यासाठी आवश्यक असतं, जे त्वचेला घट्ट आणि लवचिक बनवते. शिवाय, यामध्ये कॅरोटीनॉइड्स नावाचे अँटिऑक्सिडंट्स असतात, जे त्वचेला वय वाढल्यावर येणाऱ्या सुरकुत्यांपासून वाचवतात.
५) रताळे
रताळ्यामध्ये बीटा-कॅरोटीन भरपूर प्रमाणात असतो, जो शरीरात जाऊन व्हिटॅमिन A मध्ये रूपांतरित होतो. हे त्वचेला कोरडे होण्यापासून वाचवतो, लवचिकता राखतो आणि त्वचेच्या पेशींना संरक्षण देतो. त्याचबरोबर, रताळं व्हिटॅमिन C आणि E चा देखील चांगला स्रोत आहे.
६) पालक
ही हिरवीपानांची भाजी केवळ लोहतत्त्वासाठीच नाही, तर त्वचेच्या आरोग्यासाठीही अत्यंत उपयुक्त आहे. अँटिऑक्सिडंट्स आणि भरपूर पाण्याचं प्रमाण असल्यामुळे, पालक त्वचेला हायड्रेट ठेवतो. यासोबतच, यामध्ये त्वचेच्या संरक्षणासाठी आवश्यक असे विविध पोषक घटकही असतात.
७) एवोकॅडो
एवोकॅडोमध्ये चांगल्या प्रकारचे फॅट्स म्हणजेच मोनो आणि पॉलीअनसॅच्युरेटेड फॅट्स असतात, जे त्वचेला कोरडे होण्यापासून वाचवतात आणि आर्द्रता टिकवून ठेवतात. तसेच, यामध्ये जीवनसत्त्वे A, C, E आणि K भरपूर प्रमाणात असतात, जे त्वचेला दीर्घकाळ उजळ आणि निरोगी ठेवतात.
८) ब्रोकोली
ब्रोकोली हे एक शक्तिशाली अँटी-एजिंग अन्न आहे. यामध्ये अँटीऑक्सिडंट्ससह व्हिटॅमिन C आणि K असते, जे त्वचेच्या सुरकुत्या कमी करण्यात मदत करतात. ब्रोकोली कच्चं किंवा वाफवून खाल्ल्यास त्याचे पोषणमूल्य अधिक चांगल्या प्रकारे मिळते.
त्वचेला दीर्घकाळ तारुण्य आणि तेज राखून द्यायचं असेल, तर वर सांगितलेले पदार्थ तुमच्या आहारात नक्की असावेत. हे केवळ त्वचेसाठी नव्हे तर एकूणच शरीरासाठी फायदेशीर आहेत. योग्य आहार, भरपूर पाणी, नियमित झोप आणि तणावमुक्त जीवनशैली हे त्वचेच्या सौंदर्याचं खरं रहस्य आहे.
(अस्वीकारण : वरील सर्व बाबी प्रहार केवळ माहिती म्हणून वाचक-प्रेक्षकांपर्यंत पोहोचवत आहे. ही माहिती केवळ सामान्य माहितीच्या उद्देशाने आहे. हा वैद्यकीय सल्ला, निदान किंवा उपचारांचा पर्याय नाही. अधिक तपशीलांसाठी नेहमी आपल्या डॉक्टरांचा सल्ला घ्या. यातील माहितीची अचूकता, विश्वासार्हता किंवा परिणामकारकतेची जबाबदारी प्रहार घेत नाही आणि कोणताही दावा करत नाही.)
