पर्थ: भारत आणि ऑस्ट्रेलिया यांच्यात लवकरच सुरू होणाऱ्या एकदिवसीय आंतरराष्ट्रीय (ODI) मालिकेपूर्वी टीम इंडियाच्या नव्या जर्सीचा लुक समोर आला आहे. भारतीय क्रिकेट नियामक मंडळ आणि 'अपोलो टायर्स' यांच्यात झालेल्या नवीन स्पॉन्सरशिप करारानंतर टीम इंडियाची ही पहिली अधिकृत जर्सी आहे, ज्यावर 'अपोलो टायर्स'चा लोगो दिसत आहे.
ऑस्ट्रेलियाविरुद्धच्या मालिकेपूर्वी पर्थमधील ऑप्टस स्टेडियममध्ये झालेल्या प्री-सीरिज फोटोशूटमध्ये भारतीय खेळाडूंनी ही नवीन जर्सी परिधान केली. या फोटोशूटमध्ये यष्टिरक्षक-फलंदाज ध्रुव जुरेल आणि नितीश कुमार रेड्डी यांनी भारताचे प्रतिनिधित्व केले, तर ऑस्ट्रेलियाकडून मिचेल स्टार्क आणि ट्रॅव्हिस हेड यांचा समावेश होता.
भारतीय खेळाडूंच्या नीळ्या जर्सीवर आता 'ड्रीम11'च्या जागी 'अपोलो टायर्स'चा लोगो दिसत आहे. काही क्रिकेट चाहत्यांनी या जर्सीच्या आधुनिक लुकचे आणि स्वच्छ डिझाइनचे कौतुक केले आहे. तर, काही चाहत्यांनी 'अपोलो टायर्स'च्या लोगोच्या आकारावर आक्षेप घेतला आहे. काही चाहत्यांचे म्हणणे आहे की, लोगो खूप मोठा असून, त्यामुळे जर्सीवरील 'INDIA' हे अक्षर पूर्वीपेक्षा खाली आले आहे.
India-Australia have always produced some great contests. We are here and it is time to renew our white-ball rivalry.#AUSvIND #TeamIndia pic.twitter.com/bq1jcBbJZH
— BCCI (@BCCI) October 17, 2025
बीसीसीआय (BCCI) आणि अपोलो टायर्स करार
ऑनलाइन गेमिंगवरील सरकारी निर्बंधांमुळे 'ड्रीम11'चा स्पॉन्सरशिप करार संपुष्टात आल्यानंतर बीसीसीआयने नवीन टेंडर जारी केले होते. 'अपोलो टायर्स'ने सर्वाधिक बोली लावून ही स्पॉन्सरशिप मिळवली. 'अपोलो टायर्स' एका सामन्यासाठी बीसीसीआयला सुमारे ₹४.५ कोटी देणार आहे, जी 'ड्रीम11'च्या मागील ₹४ कोटी प्रति सामन्यापेक्षा जास्त आहे. हा नवीन करार २०२७ पर्यंत चालेल आणि या काळात टीम इंडिया जवळपास १३० सामने खेळणार आहे.
ऑस्ट्रेलियाविरुद्धच्या आगामी मालिकेत भारतीय संघ पहिल्यांदाच या नवीन जर्सीसह मैदानावर उतरणार आहे.
