विदेश
इस्त्रायलचा गाझावर हल्ला, ६ ठार
October 5, 2025 02:15 AM
गाझा : अमेरिकेचे राष्ट्राध्यक्ष डोनाल्ड ट्रम्प यांनी गाझा पट्टीत शांतता नांदावी म्हणून गाझा पीस प्लॅनची घोषणा केली होती. हमासनेही यावर सकारात्मक पाऊल उचलले होते. त्यानंतर ट्रम्प यांनी इस्त्रायलला त्वरित बॉम्ब हल्ले थांबवण्यास सांगितले होते. मात्र इस्त्रायलने शनिवारी गाझावर पुन्हा हल्ला केला आहे. या हल्ल्यात आतापर्यंत ८ जणांचा मृत्यू झाला आहे. इस्त्रायलच्या या हल्ल्यामुळे आता मिडल ईस्टमध्ये शांतता प्रस्थापित करण्याचा डोनाल्ड ट्रम्प यांचा प्लॅन फिसकटण्याची शक्यता आहे.
इस्त्रायलने गाझा पट्टीत वेगवेगळ्या ठिकाणी हल्ले केले. त्यात एका ठिकाणी ८ लोकांचा तर गाझा सिटीमध्ये केलेल्या हल्ल्यात दोघा जणांचा मृत्यू झाला आहे. दरम्यान, इस्त्रायलचे पंतप्रधान बेंजामिन नेत्यान्याहू यांच्या कार्यालयाने सांगितले की, इस्त्रायलने डोनाल्ड ट्रम्प यांच्या गाझा शांतता प्लॅनच्या पहिल्या टप्प्याची त्वरित अंमलबजावणी करण्याची तयारी सुरू केली आहे.
दरम्यान, याबाबतची माहिती माध्यमांना दिल्यानंतर देशाच्या राजकीय नेतृत्वाने गाझामधील लष्करी मोहिमेची तीव्रता कमी करण्याच्या सूचना केल्या होत्या. इस्त्रायली लष्कर प्रमुखांनी आपल्या कर्मचाऱ्यांना डोनाल्ड ट्रम्प यांच्या प्लॅनची अंमलबजावणी करण्यासाठी सज्ज राहा, असे सांगितले होते. मात्र त्यांनी गाझामधील लष्करी कारवाईची तीव्रता कमी करायची आहे की नाही याबाबत कोणताही स्पष्ट संदेश दिला नव्हता.
दरम्यान, पॅलस्टाईनमधील गाझावर हमासचे नियंत्रण आहे. त्यांनी डोनाल्ड ट्रम्प यांच्या २० पॉईंट प्लॅनला सकारात्मक प्रतिसाद दिला होता. त्यानंतर डोनाल्ड ट्रम्प यांनी इस्त्रायलने त्वरित गाझामधील बॉम्ब हल्ले थांबवण्याची सूचना केली होती. त्यांच्या मते यामुळे हमासला बंधकांना त्वरित सोडणे शक्य होईल. यावेळी त्यांनी हा प्लॅन फक्त गाझासाठी महत्वाचा नाही तर संपूर्ण मध्य पूर्व आशियातील शांततेसाठी महत्वाचा असल्याचे सांगितले होते.
