पनवेल : पनवेल महापालिकेने ९ वर्षामध्ये देशपातळीवरती विविध सन्मान प्राप्त केले. महापालिकेची वास्तू जशी आयकॉनीक इमारत बनते आहे तशीच महापालिकेची प्रतिमाही आयकॉनीक बनावी यासाठी आयुक्त मंगेश चितळे व सर्व पालिका अधिकारी कर्मचाऱ्यांना आमदार प्रशांत ठाकूर यांनी मार्गदर्शन केले. महापालिकेच्या ९ व्या वर्धापन दिनानिमित्ताने शनिवारी आद्य क्रांतीवीर वासुदेव बळवंत फडके नाट्यगृहामध्ये विशेष कार्यक्रमाचे आयोजन करण्यात आले.
आ. प्रशांत ठाकूर म्हणाले, महापालिका विविध विकास कामांच्या माध्यमातून नागरिकांशी जोडली जात आहे. विमानतळ सुरू झाल्यावरती पनवेलचे नाव वरच्या पातळीवरती येणार आहे. अनेक आव्हानांना तोंड देत, नागरिकांचे हित जपत आपण पुढे जायचे आहे. दशकपूर्ती वर्षारंभ करत विविध कार्यक्रमाच्या माध्यमातून नागरिकांच्या सेवेशी जोडले जात असल्याचे त्यांनी सांगितले.
यावेळी आयुक्त तथा प्रशासक मंगेश चितळे, अतिरीक्त आयुक्त गणेश शेटे, परिवहन व्यवस्थापक कैलास गावडे, माजी नगरसेवक अनिल भगत, माजी नगरसेविका चारूशीला घरत, शिवसेना जिल्हा प्रमुख रामदास शेवळे, शिवसेना महानगर प्रमुख प्रथमेश सोमण, उपायुक्त डॉ. वैभव विधाते, उपायुक्त मंगला माळवे, अभिषेक पराडकर, मुख्य लेखा व वित्त अधिकारी मंगेश गावडे, सहायक संचालक नगररचना केशव शिंदे, शहर अभियंता संजय कटेकर, मुख्य लेखा परिक्षक निलेश नलावडे , लेखा अधिकारी संग्राम व्हारेकाटे, सहाय्यक आयुक्त डॉ. रूपाली माने, शहर अभियंता संजय कटेकर, मुख्य जनसंपर्क अधिकारी डॉ. राजू पाटोदकर पालिका अधिकारी व कर्मचारी उपस्थित होते.