अहमदाबाद: वेस्ट इंडिजविरुद्धच्या पहिल्या कसोटी सामन्याला सुरुवात होण्यापूर्वीच भारतीय संघाला मोठा धक्का बसला आहे. भारताचा अष्टपैलू खेळाडू वॉशिंग्टन सुंदर हा सराव सत्रादरम्यान दुखापतग्रस्त झाला आहे. त्याच्या गोलंदाजी करणाऱ्या बोटाला दुखापत झाल्याचे वृत्त आहे, ज्यामुळे पहिल्या कसोटीत तो खेळण्याची शक्यता कमी झाली आहे.
काय आहे नेमके प्रकरण?
२ ऑक्टोबरपासून अहमदाबादच्या नरेंद्र मोदी स्टेडियमवर भारत आणि वेस्ट इंडिज यांच्यातील दोन कसोटी सामन्यांच्या मालिकेतील पहिला सामना सुरू होत आहे. या सामन्यासाठी भारतीय संघ कसून सराव करत असताना, अष्टपैलू वॉशिंग्टन सुंदरच्या बोटाला दुखापत झाली आहे. माहितीनुसार, सराव सत्रादरम्यान सुंदरच्या बोटाला गंभीर दुखापत झाली. यामुळे तो काही काळ सराव करू शकला नाही.
काही वेळाने तो पुन्हा गोलंदाजीसाठी आला असला तरी, त्याच्या फिटनेसवर संघ व्यवस्थापन बारीक लक्ष ठेवून आहे. ही दुखापत फार गंभीर नसल्याचे संकेत असले तरी, पहिल्या कसोटी सामन्यासाठी अंतिम ११ खेळाडूंची निवड करताना सुंदरच्या फिटनेसचा विचार केला जाईल.
शुभमन गिलच्या नेतृत्वात भारताचा सराव
आशिया चषक २०२५ च्या विजयानंतर भारतीय संघ लगेचच कसोटी मालिकेसाठी सज्ज झाला आहे. शुबमन गिल पूर्णवेळ कसोटी कर्णधार म्हणून आपली पहिली घरची मालिका खेळणार आहे. गिलच्या नेतृत्वात संघ कसून सराव करत असून, यात जसप्रीत बुमराह, कुलदीप यादव आणि अक्षर पटेल यांना पहिल्या सत्रातून विश्रांती देण्यात आली होती.
वेस्ट इंडिजविरुद्धच्या मालिकेत वॉशिंग्टन सुंदर हा रवींद्र जडेजा, अक्षर पटेल आणि कुलदीप यादव यांच्यासह फिरकी विभागातील महत्त्वाचा भाग होता. त्याची दुखापत टीम इंडियासाठी चिंतेची बाब ठरू शकते.
