चेन्नई : अभिनेता आणि तमिलगा वेट्री कळघम पक्षाचे अध्यक्ष विजय यांच्या करूर येथील प्रचार सभेत झालेल्या भीषण चेंगराचेंगरीत मृतांची संख्या ४० वर पोहोचली आहे. या घटनेनंतर पक्षाने मद्रास उच्च न्यायालयात धाव घेतली असून, या दुर्घटनेची स्वतंत्र आणि पारदर्शक चौकशी करण्याची मागणी केली आहे.
टीव्हीकेचे उपमहासचिव सी.टी.आर. निर्मल कुमार यांनी रविवारी सांगितले की, त्यांच्या पक्षाच्या याचिकेवर मद्रास उच्च न्यायालयाच्या मदुराई खंडपीठासमोर सोमवारी दुपारी २.१५ वाजता तातडीची सुनावणी होणार आहे.
"करूर दुर्घटनेची निष्पक्ष आणि पारदर्शक चौकशी व्हावी यासाठी केलेली आमची याचिका उद्या दुपारी मदुराई खंडपीठासमोर सुनावणीसाठी येणार आहे," असे निर्मल कुमार यांनी पत्रकारांना सांगितले.
सकाळपासून कडक उन्हात हजारो लोक जमले होते, पण तिथे पुरेसा पाणी, जेवण आणि वैद्यकीय मदत नव्हती. विजय यांच्या येण्यास उशीर झाला (ते रात्री ७.४० च्या सुमारास पोहोचले), ज्यामुळे गर्दीचा काही भाग पुढे सरकला आणि गोंधळ सुरू झाला. सभेच्या ठिकाणाकडे जाणाऱ्या अरुंद आणि दाट गल्लीत लोक एकमेकांना तुडवून श्वास गुदमरल्यामुळे मरण पावले. मृतांमध्ये नऊ मुले होती, तर बहुतेक महिला होत्या. ६० हून अधिक लोक सरकारी आणि खासगी रुग्णालयात उपचार घेत आहेत.
मृतांची संख्या वाढत असल्याने आणि लोकांमध्ये तीव्र संताप असल्यामुळे, तामिळनाडूच्या अलीकडच्या इतिहासातील या सर्वात मोठ्या सार्वजनिक दुर्घटनेची जबाबदारी निश्चित करण्यासाठी आता न्यायालयीन हस्तक्षेपामुळे राजकीय संघर्ष वाढण्याची शक्यता आहे.
करूर दुर्घटनाग्रस्तांना पंतप्रधान निधीतून २ लाख रुपयांची मदत जाहीर
पंतप्रधान नरेंद्र मोदी यांनी आज तामिळनाडूतील करूर येथे एका राजकीय सभेदरम्यान झालेल्या दुःखद घटनेत जीव गमावलेल्या व्यक्तींच्या कुटुंबीयांना पंतप्रधान राष्ट्रीय मदत निधीतून प्रत्येकी २ लाख रुपयांची मदत जाहीर केली आहे, अशी माहिती पंतप्रधान कार्यालयाने सोशल मीडिया 'एक्स'वर दिली. या दुर्घटनेत जे लोक जखमी झाले आहेत, त्यांना ५०,००० रुपये दिले जातील, असेही त्यात नमूद करण्यात आले आहे. "ज्यांनी आपल्या प्रियजनांना गमावले आहे, त्यांच्या कुटुंबियांसोबत माझे विचार आहेत. या कठीण काळात त्यांना शक्ती मिळो. जखमी झालेले सर्वजण लवकर बरे व्हावेत, यासाठी मी प्रार्थना करतो," असे पंतप्रधानांनी 'एक्स'वरील एका पोस्टमध्ये म्हटले होते.
करूर दुर्घटनेतील ३९ पैकी ३५ मृतदेहांची ओळख पटली
करूर येथे टीव्हीके पक्षाचे संस्थापक आणि अभिनेता विजय यांच्या राजकीय सभेदरम्यान झालेल्या भीषण चेंगराचेंगरीत मारल्या गेलेल्या ३९ लोकांपैकी ३५ मृतदेहांची ओळख पटली आहे. उर्वरित चार मृतदेहांची ओळख पटणे अजून बाकी आहे, अशी माहिती जिल्हा प्रशासनाने दिली. या दुर्घटनेत मारल्या गेलेल्या ३९ लोकांमध्ये २८ लोक करूर जिल्ह्यातील होते, प्रत्येकी दोन ईरोड, तिरुपूर आणि दिंडीगुल जिल्ह्यातील होते, तर एक व्यक्ती सालेम जिल्ह्यातील होती. आज पहाटे करूर सरकारी वैद्यकीय महाविद्यालय रुग्णालयात मृतदेहांचे पोस्टमॉर्टम करण्यात आले.
आज दुपारी मिळालेल्या माहितीनुसार, ३० मृतदेह त्यांच्या कुटुंबीयांच्या ताब्यात अंत्यसंस्कारासाठी देण्यात आले आहेत. चेंगराचेंगरीत जखमी झालेल्या एकूण ५१ लोकांवर करूर सरकारी रुग्णालयात उपचार सुरू आहेत, तर ३० लोक खासगी रुग्णालयात उपचार घेत आहेत. राज्य सरकारने त्यांच्या उपचाराचा सर्व खर्च उचलण्याचे मान्य केले आहे.
मुख्यमंत्री एम. के. स्टालिन यांनी मृतांच्या कुटुंबीयांना प्रत्येकी १० लाख रुपयांची मदत जाहीर करण्यासोबतच, या घटनेच्या न्यायिक चौकशीचे आदेशही दिले आहेत.
