अबूधाबी : आशिया कपमध्ये भारत आणि पाकिस्तान पुन्हा एकदा आमनेसामने येणार आहेत. सूर्यकुमार यादवच्या नेतृत्वाखालील भारतीय संघाने साखळी सामन्यात कट्टर प्रतिस्पर्धी पाकिस्तानला पराभवाची चव चाखायला लावली होती. आणि आता सुपर फोर टप्प्यातही ही कामगिरी कायम ठेवण्याचा प्रयत्न भारतीय संघ करणार आहे. मागील सामन्यातील हस्तांदोलन वादानंतर दोन्ही संघांमधील तणाव वाढणार असल्याने भारत आणि पाकिस्तानमधील हा सामना आणखी मनोरंजक ठरणार आहे.
भारताने साकळी सामन्यात दमदार कामगिरी केली होती. भारताने तिन्ही सामने जिंकले आणि गट अ मध्ये अव्वल स्थान पटकावले. भारताने ओमानविरुद्धच्या अंतिम संघात दोन बदल केले होते. जसप्रीत बुमराह आणि वरुण चक्रवर्ती यांना विश्रांती दिली होती. आणि वेगवान गोलंदाज अर्शदीप सिंग आणि हर्षित राणा यांना संधी देण्यात आली होती. भारताने प्रथम फलंदाजी करण्याचा आणि ओमानविरुद्धच्या त्यांच्या फलंदाजीच्या आक्रमणाची चाचणी घेण्याचा निर्णय घेतला. कर्णधार सूर्यकुमार यादवने या सामन्यात ११ व्या क्रमांकावर फलंदाजी करताना त्याच्या फलंदाजीच्या क्रमाचा प्रयोग केला. तर संजू सॅमसनला तिसऱ्या क्रमांकावर पाठवण्यात आले होते. सॅमसनने या संधीचा फायदा घेतला आणि अर्धशतक झळकावले होते.
भारताने पहिले दोन सामने सहज जिंकले असले तरी, ओमानविरुद्ध जिंकण्यासाठी त्यांना खूप मेहनत घ्यावी लागली. पाकिस्तानविरुद्ध भारताची पूर्वीची रणनीती अवलंबणे अपेक्षित आहे. खरं तर, पहिल्या दोन सामन्यांमध्ये संघ तीन फिरकीपटू आणि बुमराहच्या रूपात एका वेगवान गोलंदाजासह खेळला होता. ही रणनीती यशस्वी ठरली. भारताने ओमानविरुद्ध अर्शदीप आणि हर्षितला संघात स्थान दिले होते. पण कोणताही गोलंदाज फारसा प्रभावी ठरला नाही. पण अर्शदीपने टी-२० आंतरराष्ट्रीय सामन्यांमध्ये १०० विकेट्स पूर्ण केल्या. आणि असे करणारा तो पहिला भारतीय गोलंदाज ठरला. दुसरीकडे हर्षितलाही यश मिळाले. पण दुबईची खेळपट्टी संथ आहे आणि फिरकीपटूंना अनुकूल आहे. भारत अक्षर पटेल, कुलदीप यादव आणि वरुण चक्रवर्ती या फिरकी त्रिकुटावर अवलंबून असेल. अक्षर ओमानविरुद्ध दुखापतग्रस्त झाला होता, ज्यामुळे भारतासाठी चिंता वाढली होती. पण क्षेत्ररक्षण प्रशिक्षक टी. दिलीप यांनी स्पष्ट केले की, अक्षर चांगल्या स्थितीत आहे. त्यामुळे पाकिस्तानविरुद्धच्या सामन्यात त्याच्या सहभागाची शक्यता वाढली आहे.