इस्लामाबाद: एका फुटबॉल स्पर्धेत भाग घेण्यासाठी जपानमध्ये गेलेल्या पाकिस्तानच्या 'बनावट' फुटबॉल संघाला जपानी अधिकाऱ्यांनी विमानतळावरच ताब्यात घेतले. कागदपत्रांच्या तपासणीनंतर हा संघ मानवी तस्करीचा भाग असल्याचे समोर आले आहे, ज्यामुळे आंतरराष्ट्रीय स्तरावर पाकिस्तानची मोठी बदनामी झाली आहे.
काय आहे प्रकरण?
पाकिस्तानच्या सियालकोटमधून २२ जणांचा एक गट जपानला गेला होता. या गटाने आपण पाकिस्तानी फुटबॉल संघाचे खेळाडू असल्याचे भासवले होते. त्यांच्याकडे पाकिस्तान फुटबॉल फेडरेशनशी संबंधित कागदपत्रे आणि परराष्ट्र मंत्रालयाची बनावट 'ना हरकत प्रमाणपत्रे' (NOC) देखील होती. परंतु, जपानमधील विमानतळ अधिकाऱ्यांना त्यांच्यावर संशय आला आणि त्यांनी त्यांची सखोल चौकशी केली. या चौकशीत ते खरे खेळाडू नसून मानवी तस्करीचा बळी ठरलेले नागरिक असल्याचे उघड झाले.
या घटनेनंतर पाकिस्तानच्या फेडरल इन्व्हेस्टिगेशन एजन्सीने (FIA) तपास सुरू केला. तपासात मलिक वकास नावाच्या एका व्यक्तीला या मानवी तस्करीचा मुख्य सूत्रधार म्हणून अटक करण्यात आली आहे. त्याने 'गोल्डन फुटबॉल ट्रायल' नावाचा एक बनावट फुटबॉल क्लब सुरू केला होता. जपानला जाण्यास इच्छुक असलेल्या प्रत्येक व्यक्तीकडून त्याने ४० ते ४५ लाख रुपये घेतले होते.
जपानी अधिकाऱ्यांनी या बनावट संघाला तातडीने मायदेशी परत पाठवले. ही घटना उघडकीस आल्यानंतर पाकिस्तानच्या तपास यंत्रणांनी अधिक तपास सुरू केला आहे. हा प्रकार केवळ एकट्या या संघापुरता मर्यादित नसून, याआधीही अशा प्रकारे अनेकांना विदेशात पाठवण्यात आले असल्याचा संशय व्यक्त करण्यात येत आहे. या घटनेमुळे आंतरराष्ट्रीय पातळीवर पाकिस्तानची पुन्हा एकदा मानहानी झाली आहे.