मुंबई : चेंबूर–जेकब सर्कल मोनोरेल मार्गिकेवरील वारंवार होणाऱ्या तांत्रिक बिघाडांमुळे प्रवाशांच्या सुरक्षिततेवर प्रश्नचिन्ह निर्माण झाले असून, मुंबई महानगर प्रदेश विकास प्राधिकरणाने (एमएमआरडीए) मोनोरेल सेवा अनिश्चित काळासाठी बंद करण्याचा निर्णय आयुक्त डॉ. संजय मुखर्जी यांनी जाहीर केला आहे. या मार्गिका केव्हापासून बंद राहतील आणि पुनश्च सुरू होण्यासाठी किती वेळ लागेल, याची माहिती अद्याप स्पष्ट करण्यात आलेली नाही.
एमएमआरडीएने २४६० कोटी रुपये खर्च करून उभारलेली २० किमी लांबीची चेंबूर–जेकब सर्कल मोनोरेल सेवा सुरुवातीपासूनच तोट्यात आहे. प्रवाशांचा प्रतिसाद अपुरा मिळत असतानाच गाड्यांचे वारंवार अपघात आणि तांत्रिक बिघाडांमुळे प्रकल्पावर सातत्याने टीका होत आहे.
गेल्या महिन्यातच मोनोरेल गाड्या तीन वेळा तांत्रिक बिघाडामुळे थांबल्या. ऑगस्टमध्ये तर एकाच दिवशी दोन गाड्या अतिवजनामुळे बंद पडल्या होत्या. त्यातील एका गाडीतून ५८८ प्रवाशांना अग्निशमन दलाच्या मदतीने दरवाजा तोडून सुरक्षित बाहेर काढावे लागले. २०१७ मध्येही एका गाडीला लागलेल्या आगीमुळे सेवा तब्बल नऊ महिने ठप्प होती.
वारंवारच्या या घटनांमुळे मोनोरेल प्रकल्पावर ‘पांढरा हत्ती’ असा शिक्का बसल्याची टीका सुरू आहे. अपघात आणि बिघाड हाताळण्यासाठी एमएमआरडीएकडे स्वतंत्र आपत्ती व्यवस्थापन यंत्रणा नसून अग्निशमन दलावरच अवलंबून राहावे लागत असल्याचेही उघड झाले आहे. तांत्रिक अडचणींमुळे नवीन मोनोरेल रेक्स सेवेत आणण्यातही उशीर होत आहे. प्रवासी सुरक्षिततेला प्राधान्य देत सध्या मोनोरेल मार्गिका बंद ठेवून पुढील उपाययोजना आखण्याचा निर्णय एमएमआरडीएने घेतला आहे.
