मुंबई : मराठी चित्रपटसृष्टीत एक वेगळीच लाट घेऊन आलेल्या ‘दशावतार’ या चित्रपटाने प्रेक्षकांच्या मनावर एक वेगळीच छाप सोडली आहे . कोकणच्या मातीत रुजलेल्या एका कलाकाराच्या भावविश्वावर आधारित असलेल्या या चित्रपटात ८० वर्षीय दिलीप प्रभावळकर यांनी बाबुली मिस्त्री ही प्रमुख भूमिका साकारली आहे. त्यांच्या अभिनयाचे आणि कथानकाचे सर्वत्र कौतुक होत आहे.
१२ सप्टेंबर २०२५ रोजी ‘दशावतार’ प्रदर्शित झाला आणि त्याच दिवशी रिलीज झालेल्या ‘बिन लग्नाची गोष्ट’ आणि ‘आरपार’ या सिनेमांमध्येही चुरस होती. मात्र प्रदर्शनानंतर पहिल्याच दोन दिवसांत मिळालेल्या प्रेक्षकांच्या सकारात्मक प्रतिसादामुळे ‘दशावतार’ने स्पर्धेत आघाडी घेतली आहे.
चित्रपटाने पहिल्या दिवशी ५८ लाखांची कमाई करत समाधानकारक सुरुवात केली, तर दुसऱ्या दिवशी ही कमाई १.३९ कोटींपर्यंत गेली. सॅकनिल्कच्या माहितीनुसार, केवळ दोन दिवसांतच एकूण कमाईने २.२ कोटींचा टप्पा ओलांडला असून यामध्ये आणखी वाढ होण्याची शक्यता आहे.
लेखक-दिग्दर्शक सुबोध खानोलकर यांनी कोकणातील जीवन, लोककला आणि परंपरेशी निगडित महत्त्वाच्या सामाजिक मुद्द्यांना हात घालत ‘दशावतार’ साकारला आहे. दिलीप प्रभावळकर यांच्यासह महेश मांजरेकर, भरत जाधव, सिद्धार्थ मेनन, अभिनय बेर्डे, प्रियदर्शिनी इंदलकर आणि इतर अनुभवी कलाकारांनी आपल्या भूमिकांमधून कथा प्रभावीपणे उभी केली आहे.
सिनेमाच्या विषयवस्तू, अभिनय, सिनेमॅटोग्राफी आणि भावनिक मांडणीमुळे सोशल मीडियावर चित्रपटाची चांगलीच चर्चा सुरू आहे. कोकणच्या मातीतील साधेपणाला आणि लोककलेला मोठ्या पडद्यावर ठसा उमटवणाऱ्या ‘दशावतार’ने मराठी सिनेसृष्टीत वेगळी ओळख निर्माण केली आहे .
