नवी दिल्ली: भारताची प्रतिभावान बॉक्सर जैस्मिन लंबोरियाने जागतिक बॉक्सिंग चॅम्पियनशिप २०२५ मध्ये ५७ किलो वजनी गटात सुवर्णपदक जिंकून इतिहास रचला आहे. अंतिम फेरीत तिने पोलंडच्या पॅरिस ऑलिंपिकची रौप्यपदक विजेती ज्युलिया सेरेमेटाचा (Julia Szeremeta) ४-१ अशा मोठ्या फरकाने पराभव करून भारतासाठी स्पर्धेतले पहिले सुवर्णपदक जिंकले.
लिव्हरपूल येथे सुरू असलेल्या या स्पर्धेत जैस्मिन पहिल्या राऊंडमध्ये थोडी पिछाडीवर होती. मात्र त्यानंतर तिने जोरदार पुनरागमन केले. याआधी उपांत्य फेरीत तिने व्हेनेझुएलाच्या कॅरोलिना अल्काला (Carolina Alcala) हिचा ५-० ने पराभव करून अंतिम फेरीत प्रवेश केला होता. हा विजय तिच्यासाठी केवळ एक पदकच नव्हता, तर भारतीय महिला बॉक्सिंगसाठी एक मोठा टप्पा होता.
याच स्पर्धेत भारताच्या नुपूर श्योराणने ८०+ किलो वजनी गटात आणि पूजा राणीने ८० किलो वजनी गटात कांस्यपदक जिंकले आहे, तर मीनाक्षी हुड्डा देखील ४८ किलो वजनी गटात पदक निश्चित करण्यात यशस्वी झाली आहे.
