नवी दिल्ली: भारताला नवे उपराष्ट्रपती म्हणून सी. पी. राधाकृष्णन मिळाले आहेत. उपराष्ट्रपती निवडणुकीत एनडीएचे उमेदवार सी. पी. राधाकृष्णन यांनी विरोधी उमेदवारावर दणदणीत विजय मिळवला. या विजयामुळे भाजपची सत्ता अधिक मजबूत झाली आहे. या निवडणुकीत सी. पी. राधाकृष्णन यांना पहिल्या पसंतीची तब्बल ४५२ मते मिळाली, तर त्यांचे प्रतिस्पर्धी उमेदवार बी. सुदर्शन रेड्डी यांना केवळ ३०० मते मिळाली. या विजयामुळे एनडीएच्या गोटात आनंदाचे वातावरण आहे, तर दुसरीकडे विरोधी पक्षाची मते फुटल्याचे स्पष्ट झाले आहे. राधाकृष्णन यांच्या विजयानंतर त्यांना देशभरातून अभिनंदनाचे संदेश येत आहेत.

सी. पी. राधाकृष्णन यांचा दणदणीत विजय; विरोधकांची मते फुटली?

निवडणूक अधिकारी पी.सी. मोदी यांनी निकालाची घोषणा करताना सांगितले की, सी. पी. राधाकृष्णन यांना पहिल्या पसंतीची तब्बल ४५२ मते मिळाली, तर बी. सुदर्शन रेड्डी यांना केवळ ३०० मते मिळाली. या निवडणुकीत एकूण ७८१ पात्र खासदारांपैकी ७६७ जणांनी मतदान केले. यापैकी ७५२ मते वैध ठरली, तर १५ मते अवैध ठरली, हे विशेष.

विरोधी पक्षांना धक्का

मतदान संपल्यानंतर काँग्रेसचे सरचिटणीस जयराम रमेश यांनी दावा केला होता की, विरोधी पक्षाचे सर्व ३१५ खासदार एकजुटीने मतदान करतील. मात्र, निकालात सुदर्शन रेड्डी यांना केवळ ३०० मते मिळाल्याने विरोधी गटात मतभेद झाल्याचे स्पष्ट झाले आहे. राधाकृष्णन यांना ४५२ मते मिळाल्यामुळे त्यांच्या बाजूने विरोधी खासदारांनी क्रॉस-व्होटिंग केल्याचे निष्पन्न झाले आहे. उपराष्ट्रपती निवडणुकीत व्हिप जारी केला जात नाही, त्यामुळे खासदार स्वतंत्रपणे मतदान करू शकतात. या निकालामुळे एनडीएच्या गोटात आनंदाचे वातावरण आहे, तर विरोधी गटासाठी हा एक मोठा धक्का मानला जात आहे.