इंदूर : एअर इंडियाच्या इंदूर - दिल्ली विमानाने दिल्लीच्या दिशेने प्रवास सुरू केला. उड्डाण करुन विमान दिल्लीच्या दिशेने झेपावले आणि धक्कादायक घटना घडली. विमानाचे एक इंजिन बंद पडले. ज्यावेळी ही घटना घडली त्यावेळी १६१ प्रवासी असलेले एअर इंडियाचे विमान आकाशात होते. पुढील संकट टाळण्यासाठी मार्ग बदलून तातडीने हे विमान इंदूर विमानतळावर उतरवण्यात आले. विमान व्यवस्थित उतरले आणि पुढचे संकट टळले. सर्व प्रवासी सुरक्षित आहेत. विमानाचे बंद पडलेले इंजिन दुरुस्त करण्याचे काम तंत्रज्ञ करत आहेत.
एअर इंडिया एक्सप्रेस AXB 1028 विमानाच्या वैमानिकाने एक इंजिन बंद पडल्याचे नियंत्रण कक्षाला कळवले. माहिती मिळताच अग्निशमन दल, रुग्णवाहिका आणि सीआयएसएफ पथकाने विमानतळावर धाव घेतली. सुदैवाने, विमान विमानतळावर सुरक्षितपणे उतरवण्यात आले.
याआधी १२ जून २०२५ रोजी गुजरातमध्ये अहमदाबाद येथे एअर इंडियाच्या बोईंग ७८७ - ८ ड्रीमलायनर विमानाचा अपघात झाला होता. सर्व इंजिन बंद पडल्यामुळे उड्डाण केल्यानंतर अवघ्या काही सेकंदात एअर इंडियाचे विमान एका इमारतीला धडक दिल्यानंतर मेडिकल हॉस्टेलवर कोसळले होते. या दुर्घटनेत एकूण २६० जणांचा मृत्यू झाला आणि ६८ जण जखमी झाले होते.
