बंगळुरू: रॉयल चॅलेंजर्स बंगळूर (RCB) संघाचा लाडका खेळाडू, 'मिस्टर ३६०' एबी डिव्हिलियर्सने पुन्हा एकदा आयपीएलमध्ये परतण्याचे संकेत दिले आहेत. मात्र, यावेळी तो खेळाडू म्हणून नाही, तर नव्या भूमिकेत संघात सामील होऊ शकतो. नुकत्याच दिलेल्या एका मुलाखतीत त्याने आयपीएलमध्ये, विशेषतः आरसीबीसोबत पुन्हा जोडले जाण्याची इच्छा व्यक्त केली आहे.
डिव्हिलियर्सने स्पष्ट केले आहे की, पूर्ण हंगामासाठी खेळाडू म्हणून खेळणे त्याच्यासाठी आता शक्य नाही, परंतु जर आरसीबीला प्रशिक्षक किंवा मार्गदर्शक (Mentor) म्हणून त्याची गरज भासली तर तो नक्कीच परत येईल. "माझं मन नेहमी आरसीबीसोबत राहील," असे त्याने सांगितले.
एबी डिव्हिलियर्सने 2021 मध्ये क्रिकेटमधून निवृत्ती जाहीर केली होती. त्याने आरसीबीसाठी 157 सामने खेळले, ज्यात 4522 धावा केल्या. त्याचा स्ट्राइक रेट 158.33 होता. आरसीबीच्या चाहत्यांसाठी तो केवळ एक खेळाडू नसून एक भावना आहे आणि त्याच्या पुनरागमनाची बातमी त्यांच्यासाठी आनंदाची आहे. 2016 चा आयपीएल हंगाम त्याच्यासाठी सर्वात यशस्वी ठरला होता, ज्यात त्याने 16 सामन्यांत 687 धावा केल्या होत्या.
