अलिबाग: दिग्दर्शक हेमंत ढोमे यांचा मातृभाषेतील शिक्षणाचे महत्त्व सांगणारा नवा चित्रपट 'क्रांतिज्योती विद्यालय-मराठी माध्यम' लवकरच प्रेक्षकांच्या भेटीला येणार आहे. या चित्रपटाच्या चित्रीकरणाचा मुहूर्त सोहळा अलिबाग येथे महिला व बालविकास मंत्री आदिती सुनील तटकरे यांच्या हस्ते नुकताच पार पडला. यावेळी दिग्दर्शक हेमंत ढोमे आणि निर्माती क्षिती जोग उपस्थित होते. हा चित्रपट शिक्षणातील बदल, मराठी शाळांची कमी होणारी संख्या आणि मातृभाषेतून होणाऱ्या जडणघडणीवर भाष्य करणार आहे.
मातृभाषेतून शिक्षण संस्कारांवर परिणाम करतं
"आपल्या प्रत्येकाच्या आयुष्यात शाळेचं मोठं योगदान असतं. मातृभाषेतून मिळणारं शिक्षण विद्यार्थ्यांच्या संस्कारांवर खोलवर परिणाम करतं. 'क्रांतिज्योती विद्यालय-मराठी माध्यम' हा चित्रपट समाजाला योग्य संदेश देईल आणि तो विचार करायला लावणारा ठरेल. रायगड जिल्ह्यात या चित्रपटाचा मुहूर्त झाल्याचा मला अभिमान आहे. दिग्दर्शक हेमंत ढोमे आणि निर्माती क्षिती जोग नेहमीच समाजाला आरसा दाखवणारे आशयसंपन्न चित्रपट सादर करतात"; असे आदिती तटकरे या प्रसंगी म्हणाल्या,
मराठी शाळांविषयीची चिंता व्यक्त
दिग्दर्शक हेमंत ढोमे यांनी आपल्या मराठी शाळेतील आठवणींना उजाळा दिला. "आज मी जे काही आहे ते माझ्या मराठी शाळांमुळेच आहे. मातृभाषेतून शिकताना मला माझी संस्कृती, परंपरा आणि माणसं समजली. पण आज मराठी शाळा कमी होत चालल्या आहेत, ही चिंतेची बाब आहे. या चित्रपटातून मातृभाषेतून होणारे शिक्षण कमीपणाचं नसून खरं तर ते समृद्ध करणारं आहे, हे सांगण्याचा प्रयत्न असेल." असं ते म्हणाले.
