मुंबई : जड मालवाहतूक करणाऱ्या वाहनांसाठी चालकासोबत क्लीनरची आवश्यकता नाही. या संदर्भातली अधिसूचना प्रसिद्ध करण्यात आली आहे. नागरिकांकडून २९ ऑगस्टपर्यंत हरकती आणि सूचना मागण्यात आल्या आहेत. ही माहिती राज्याचे परिवहन मंत्री प्रताप सरनाईक यांनी दिली.
राज्यातील जड मालवाहतूक करणाऱ्या अनेक वाहनधारक संघटनांनी केलेल्या आंदोलनात चालकांसोबत क्लीनर देण्याची अट शिथील करण्याची आग्रही मागणी केली होती. आता अत्याधुनिक तंत्रज्ञानाच्या साह्याने वाहन निर्मिती होत असल्यामुळे क्लीनरची गरज पडत नाही. तरी ही अट कायम ठेवल्यामुळे खर्च वाढत होता. हा खर्च कमी करण्यासाठीच क्लीनरची अट शिथील करण्याची मागणी होत होती. अखेर महाराष्ट्र शासनाने मोटार वाहन नियम, १९८९ मध्ये सुधारणा करण्याचा प्रस्ताव जारी केला आहे. हरकती आणि सूचनांची दखल घेऊन राज्य शासन २९ ऑगस्ट रोजी अंतिम निर्णय जाहीर करणार आहे.
नागरिकांना हरकती - सूचना परिवहन आयुक्त, परिवहन आयुक्त कार्यालय, पाचवा मजला, फाउंटन टेलिकॉम बिल्डिंग, क्र. दोन, एम. जी. रोड, फोर्ट, मुंबई – 400 001 येथे पाठवण्याचे आवाहन करण्यात आले आहे.
ड्रायव्हर असिस्ट सिस्टीमने सुसज्ज जड मालवाहतूक वाहनामध्ये क्लीनरची आवश्यकता नाही. कारण या वाहनांमध्ये 360 अंश दृश्य कॅमेरा, सर्व ब्लाइंड स्पॉट व मागील भागाचे थेट दृश्य उपलब्ध करून देणारी सुविधा, तसेच ध्वनी आणि दृश्य स्वरूपात इशारे देणारी प्रॉक्सिमिटी अलार्म प्रणाली असते. या सर्व यंत्रणेने सुसज्ज ड्रायव्हर असिस्ट सिस्टीम असल्यास संबंधित जड मालवाहक वाहनासाठी क्लीनरची आवश्यकता नाही.
