मुंबई: मुंबईतील मुसळधार पावसामुळे लोकल सेवेवर परिणाम झाल्याने प्रवाशांनी मोनोरेलकडे धाव घेतली, मात्र क्षमतेपेक्षा जास्त गर्दीमुळे आज मोनोरेलची सेवाही ठप्प झाली. भक्ति पार्क ते चेंबूरदरम्यान धावणारी RST-4 ही मोनोरेल मैसूर कॉलनी स्टेशनजवळ अचानक थांबली, कारण तिच्या मूळ क्षमतेपेक्षा जास्त प्रवासी असल्यामुळे तांत्रिक बिघाड झाला.
प्राथमिक तपासणीनुसार, मोनोरेलची मूळ क्षमता १०४ टन असताना, आजच्या प्रचंड गर्दीमुळे तिचे वजन सुमारे १०९ मेट्रिक टन झाले होते. या अतिरिक्त वजनामुळे पॉवर रेल आणि करंट कलेक्टरमधील संपर्क तुटला आणि वीजपुरवठा खंडित झाला. त्यामुळेच ही मोनोरेल जागेवर थांबली.
एमएमआरडीएने तातडीने तंत्रज्ञांची टीम घटनास्थळी पाठवली आणि दुसऱ्या मोनोरेलने तिला खेचून स्टेशनपर्यंत आणण्याचा प्रयत्न केला, मात्र अतिरिक्त वजनामुळे हे शक्य झाले नाही. त्यामुळे अखेर अग्निशमन दलाच्या मदतीने बचावकार्य करावे लागले.
मुंबई: मुंबईत सुरू असलेल्या मुसळधार पावसामुळे आधीच लोकल सेवा विस्कळीत झाली असताना, आता मोनोरेलमध्येही तांत्रिक बिघाड झाल्याने प्रवाशांना मोठ्या ...
आज हार्बर लाईनवरील लोकल सेवा बंद असल्यामुळे प्रवाशांची प्रचंड गर्दी मोनोरेल स्थानकांवर झाली. सुरक्षा कर्मचाऱ्यांनी वारंवार आवाहन करूनही गर्दी नियंत्रणात आली नाही, कारण प्रवाशांची संख्या खूप वाढली होती.
एमएमआरडीएने स्पष्ट केले आहे की, मोनोरेलची रचना मर्यादित क्षमतेसाठी आहे आणि ती लोकल किंवा मेट्रोसारख्या मोठ्या गर्दीचे वहन करण्यासाठी तयार केलेली नाही. अशा आपत्कालीन परिस्थितीत प्रवाशांनी सुरक्षा आणि तांत्रिक पथकांच्या सूचनांचे पालन करावे, असे आवाहन एमएमआरडीएने केले आहे.
सध्या एमएमआरडीए, बृहन्मुंबई महानगरपालिका आणि इतर आपत्कालीन सेवांच्या समन्वयाने प्रवाशांना सुरक्षित बाहेर काढण्याचे काम युद्धपातळीवर सुरू आहे. या घटनेची सखोल तांत्रिक तपासणी केली जात असून, भविष्यात अशा घटना पुन्हा घडू नयेत यासाठी तातडीने उपाययोजना केल्या जातील, असेही एमएमआरडीएने सांगितले.
