मुंबई: गेले दोन दिवस मुंबईला पाऊस झोडपतो आहे, अनेक ठिकाणी पाणी साचले असून, वाहतूक व्यवस्था ठप्प झाली आहेत. त्यामुळे शाळा आणि महाविद्यालयांना सुट्टी जाहीर करण्यात आली आहे. मात्र, या दरम्यानच एक बातमी समोर आली आहे. ती म्हणजे मुसळधार पाऊसात शाळेला जाणाऱ्या मुलांची बस रस्त्यावर पाणी साचल्यामुळे अडकली होती. गेली तासभर मुलं बसमध्ये अडकून पडली होती. अशावेळी स्थानिकांचा पुढाकार आणि झोन ४ च्या पोलिसांनी तात्काळ मदतकार्य करून मुलांना सुखरूप बाहेर काढले. या घटनेचा व्हिडिओ सोशल मिडियावर देखील प्रचंड व्हायरल होत आहे. पण ही घटना मुंबईत नेमकी कुठे घडली? आणि कोणत्या शाळेची ती बस होती? असे प्रश्न अनेकजण विचारत आहेत. तर याबद्दलची सविस्तर माहिती जाणून घेऊया.
View this post on Instagram
मुंबईमध्ये सध्या मुसळधार पाऊसाने हाहाकार केला आहे. भारतीय हवामान खात्याने मुंबईसाठी रेड अलर्ट जारी केला असून आणखीन तीन दिवस देखील अशाचप्रकारे मुसळधार पाऊसाची शक्यता वर्तवली आहे. त्यामुळे दुपारच्या शाळा आणि महाविद्यालयांना पूर्ण दिवस सुट्टी जाहीर करण्यात आली, तर सकाळच्या सर्व शाळांना अर्धा दिवसाची सुट्टी देण्यात आली. यादरम्यान मुलांना घरी घेऊन जाणारी शालेय बस पावसाच्या पाण्यात अडकल्याचा एक व्हिडिओ व्हायरल झाला आहे. ज्यामध्ये पोलिस मुलांना बसमधून काढून कंबरेवर घेऊन गुडघाभर पाण्यातून मार्ग काढताना दिसून आले. ही घटना माटुंगा पोलिस ठाण्याजवळ घडली. दिवसभर पडत असलेल्या पावसामुळे येथे पाणी भरले होते. डॉन बॉस्को स्कूलची बस या पाण्यात अडकली. बसमध्ये सहा लहान मुले, दोन महिला कर्मचारी आणि चालक जवळजवळ एक तास अडकून पडले होते. अशावेळी स्थानिकांनी डीसीपी झोन ४ ला याबद्दलची माहिती दिली. तात्काळ कारवाई करून माटुंगाचे वरिष्ठ पोलिस निरीक्षक रवींद्र पवार आणि त्यांची टीम घटनास्थळी पोहोचली आणि दोन मिनिटांत सर्वांना वाचवले आणि त्यांना सुरक्षितपणे पोलीस ठाण्यात नेले. पोलिसांनी मुलांची भिती दुर करण्यासाठी त्यांना बिस्किटे देखील दिली.
पोलिसांच्या या कामगिरीचे आता सर्वत्र कौतुक होत आहे. कारण या व्हिडीओमध्ये पोलिस मुलांना आपल्या कडेवर घेऊन पाण्यातून रस्ता काढत सुरक्षित ठिकाणी घेऊन जाताना दिसून येतात. पोलिसांमधली कार्यतत्परता आणि लहान मुलांप्रती त्यांच्यातल्या दर्यादिलीने पाहणाऱ्यांचे मन जिंकले.
