मुंबई: आजपासून बरोबर पाच वर्षांपूर्वी, १५ ऑगस्ट २०२० रोजी, भारताच्या स्वातंत्र्यदिनी भारतीय क्रिकेट चाहत्यांना एका मोठ्या धक्क्याला सामोरे जावे लागले. भारताचे माजी कर्णधार महेंद्रसिंग धोनी यांनी आंतरराष्ट्रीय क्रिकेटमधून निवृत्ती जाहीर केली आणि त्यांच्या पाठोपाठ लगेचच त्यांचे सहकारी सुरेश रैना यांनीही हाच निर्णय जाहीर केला. या दोन दिग्गजांच्या निवृत्तीला आज पाच वर्षे पूर्ण झाली आहेत.
महेंद्रसिंग धोनीने आपल्या इंस्टाग्राम अकाऊंटवर एक व्हिडिओ शेअर करून हा निर्णय जाहीर केला होता. ‘मला नेहमीच मिळालेल्या प्रेमाबद्दल आणि समर्थनाबद्दल तुमचे खूप खूप आभार. संध्याकाळी ७ वाजून २९ मिनिटांपासून मला निवृत्त समजले जावे,’ अशा भावनिक संदेशासह धोनीने ही घोषणा केली. यानंतर काही वेळातच सुरेश रैनानेही धोनीसोबतचा एक फोटो शेअर करत ‘माही तुमच्यासोबत खेळणे खूप छान होते. या प्रवासात तुमच्यासोबत सामील होण्याचा मला अभिमान आहे. धन्यवाद भारत. जय हिंद!’ असे लिहित आपल्या निवृत्तीची घोषणा केली.
View this post on Instagram
या दोन्ही खेळाडूंच्या या निर्णयाने क्रिकेट जगतासह चाहत्यांना मोठा धक्का बसला होता. धोनीने आपल्या शांत आणि संयमी नेतृत्वाने भारतीय संघाला २००७ चा टी-२० विश्वचषक, २०११ चा एकदिवसीय विश्वचषक आणि २०१३ ची चॅम्पियन्स ट्रॉफी जिंकून दिली. तर सुरेश रैना मधल्या फळीतील एक महत्त्वाचा फलंदाज आणि उत्कृष्ट क्षेत्ररक्षक म्हणून ओळखला जातो.
त्यांच्या या निवृत्तीनंतरही दोघांची मैत्री कायम आहे. आयपीएलमध्ये चेन्नई सुपर किंग्जकडून खेळताना त्यांची जोडी अनेकदा पाहायला मिळाली आहे. आजही हे दोन्ही खेळाडू क्रिकेट चाहत्यांच्या मनात घर करून आहेत आणि त्यांच्या निवृत्तीची ही पाच वर्षे त्यांच्या कारकिर्दीची आठवण करून देत आहेत.
