डोंबिवली : स्वातंत्र्यदिनी कल्याण डोंबिवली महापालिका हद्दीत चिकन मटण आदी मांसाहार खरेदी विक्री करण्यास बंदी आहे. पण हे पदार्थ त्या दिवशी घरी कोणी खात असेल तर त्यावर बंदी नाही. यामुळे स्वातंत्र्यदिनी चिकन आणि मटण यांची विक्री सुरू असल्याचे आढळले तर संबंधित दुकानदाराचा परवाना जप्त केला जाईल, असे कल्याण डोंबिवली महापालिका प्रशासनाने जाहीर केले आहे. महापालिकेला अधिनियमानुसार मिळालेल्या अधिकारात १९८८साली घेण्यात आलेल्या निर्णयाची आपण अंमलबजावणी केली असल्याचे पालिका आयुक्त अभिनव गोयल यांनी सांगितले. त्यांनी निर्णयावर ठाम असल्याचेही जाहीर केले.
कल्याण डोंबिवली महापालिका हद्दीत १९८८ च्या तत्कालीन प्रशासकांनी गणेशोत्सव, १५ऑगस्ट यासह पाच ते सहा दिवस शहरात कत्तलखाने आणि चिकन मटण विक्रीची दुकाने बंद ठेवण्याचे आदेश काढले होते. तेव्हापासून या आदेशाची अंमलबजावणी सुरू आहे. पण आता महापालिकांच्या निवडणुका जवळ आल्याचे लक्षात येताच राजकीय पक्षांनी या मुद्यावरुन राजकारण सुरू केल्याची चर्चा आहे.
राजकीय पक्षांनी पालिका मुख्यालयाच्या आवारात मांसाहार करू आणि कोंबड्या सोडू असे इशारे देत आंदोलन करणार असल्याचे जाहीर केले. विरोधकांनी निर्णय मागे घेण्यासाठी आयुक्तांवर दबाव आणला आहे. याचवेळी कल्याण डोंबिवली महापालिकेच्या बंदीच्या निर्णयाची अंमलबजावणी मालेगाव, छत्रपती संभाजीनगर, नागपूर या महापालिकांनीही केली आहे. यामुळे निर्णयावर ठाम असल्याचे कल्याण डोंबिवली महापालिकेचे आयुक्त अभिनव गोयल म्हणाले.
