परळी वैजनाथ: राज्याच्या पर्यावरण व पशुसंवर्धन मंत्री पंकजा मुंडे यांचे वैद्यनाथ अर्बन बँकेवर वर्चस्व कायम राहिले आहे. पंकजा मुंडे व आ. धनंजय मुंडे यांच्या नेतृत्वाखालील लोकनेते गोपीनाथराव मुंडे जनसेवा पॅनलचे सर्वच्या सर्व म्हणजे तेराही उमेदवार मोठया मताधिक्याने निवडून आले आहेत. या निवडणुकीत शरद पवार यांच्या राष्ट्रवादी काँग्रेसचा दारूण पराभव झाला.
बीडसह राज्यभरात शाखा असलेल्या वैद्यनाथ बँक निवडणुकीचे मतमोजणी बीडच्या बाजार समितीत पार पडली. यामध्ये १७ पैकी ४ जागा यापूर्वीच बिनविरोध निवडून आल्या होत्या, तर उर्वरित १३ जागांसाठी मतदान झाले होते. यातील विरोधी उमेदवारांना डिपॉझिट वाचवण्याएवढेही मतदान मिळालेले नाही. या निवडणुकीत राष्ट्रवादी काँग्रेस शरद पवार गटाचे राजाभाऊ फड यांनी विरोधात उमेदवार उभे केल्याने ही निवडणूक झाली. परंतु मतदारांनी पंकजा मुंडे यांच्याच पॅनलवर विश्वास दाखवल्याचे दिसून आले.
संचालक मंडळाच्या निवडणुकीसाठी परळीपासून मुंबईपर्यंतच्या ३६ मतदान केंद्रावर शनिवारी मतदान पार पडले. एकूण ४३ हजार ९६२ मतदारसंख्येपैकी १६ हजार २८७ मतदारांनी आपला मतदानाचा हक्क बजावला, एकूण मतदानाची टक्केवारी ३७.५ इतकी नोंदवली गेली होती.