नवी दिल्ली: भारताचा नीरज चोप्रा आणि पाकिस्तानचा अर्शद नदीम या दोघांनीही आगामी सिलेसिया डायमंड लीगमधून माघार घेतली आहे. त्यामुळे अ‍ॅथलेटिक्स चाहत्यांची घोर निराशा झाली आहे. या स्पर्धेतून माघार घेतल्याने दुहेरी ऑलिंपिक पदक विजेता नीरज चोप्रा आणि पॅरिस ऑलिंपिक सुवर्णपदक विजेता अर्शद नदीम यांच्यातील भारत-पाकिस्तान सामना होण्याच्या सर्व आशा धुळीस मिळाल्या आहेत.
जुलैमध्ये नदीमच्या उजव्या पायाच्या पायावर शस्त्रक्रियेनंतर या स्पर्धेत न खेळण्याचा त्याने निर्णय घेतला होता. पण नीरज चोप्राच्या माघार घेण्याचे कारण अजूनही अस्पष्ट आहे. ही स्पर्धा १६ ऑगस्ट रोजी पोलंडमधील सिलेसिया येथे होणार होती. नदीमने ९२.९७ मीटरच्या प्रचंड भालाफेकसह पॅरिस ऑलिंपिकमध्ये सुवर्णपदक जिंकले होते. तर ८९.४५ मीटरची सर्वोत्तम कामगिरी नोंदवणाऱ्या नीरजला रौप्यपदकावर समाधान मानावे लागले होते.
नीरजने २०२५ च्या हंगामाची चांगली सुरुवात केली आहे. त्याने दोहा डायमंड लीगमध्ये दुसरे स्थान मिळवून इतिहास रचला आणि ९० मीटरपेक्षा जास्त अंतरावर त्याचा पहिलाच थ्रो ९०.२३ मीटरपर्यंत पोहोचला. नीरजने पोलंडमधील जानुस कुसोसिन्स्की मेमोरियलमध्ये दुसरे स्थान मिळवून आपली लय कायम राखण्यात यश मिळवलं होतं. नीरजने बंगळुरूमधील श्री कांतीरवा आउटडोअर स्टेडियममध्ये आयोजित पहिल्या नीरज चोप्रा क्लासिकमध्ये विजय मिळवला होता. ही स्पर्धा त्याच्या सन्मानार्थ आयोजित करण्यात आली होती. दरम्यान, नीरज आणि अर्शद आता टोकियो येथे १३ ते २१ सप्टेंबर दरम्यान होणाऱ्या जागतिक अ‍ॅथलेटिक्स चॅम्पियनशिपसाठी तयारी करत आहेत.
