पुणे: शहरात गुन्हेगारीच्या घटनांमध्ये वाढ होत असताना, आता पुण्यात पुन्हा एकदा कोयता गँगचा धुमाकूळ पाहायला मिळाला आहे. हडपसर परिसरातील साडे सतरा नळी भागात काल, सोमवारी रात्री काही टवाळखोरांनी हातात कोयते घेऊन दहशत माजवली. त्यांनी रस्त्याच्या कडेला उभ्या असलेल्या अनेक वाहनांची तोडफोड केली, तसेच एका दुकानात घुसून नुकसानाचा प्रयत्न केला. या घटनेमुळे संपूर्ण परिसरात भीतीचे वातावरण पसरले आहे.
View this post on Instagram
ही घटना रात्री सुमारे साडेनऊ वाजण्याच्या सुमारास घडली. चार ते पाच तरुण दुचाकींवरून आले आणि त्यांनी अचानकपणे वाहनांवर हल्ला केला. त्यांनी रिक्षा आणि चारचाकी गाड्यांची तोडफोड केली. यानंतर ते एका स्वीट मार्ट आणि पाणीपुरीच्या दुकानात घुसले आणि कोयत्याने दुकानांचे नुकसान केले.
घटनेची माहिती मिळताच हडपसर पोलिसांनी तातडीने घटनास्थळी धाव घेतली. पोलिसांनी परिसरातील सीसीटीव्ही फुटेज तपासले आणि आरोपींचा शोध सुरू केला. या घटनेनंतर पोलिसांनी त्वरीत कारवाई करत तीन संशयितांना ताब्यात घेतले आहे. या टोळीतील इतर आरोपींचा शोध सुरू असून, त्यांच्यावर गुन्हा दाखल करण्याची प्रक्रिया सुरू आहे. या घटनेमुळे स्थानिक नागरिकांमध्ये संताप आणि भीतीचे वातावरण आहे, आणि त्यांनी पोलिसांकडे कठोर कारवाईची मागणी केली आहे.
