मॉस्को: रशियाच्या कामचटका प्रदेशात आज पहाटे ८.७ रिश्टर स्केल तीव्रतेचा शक्तिशाली भूकंप झाल्याने परिसर हादरला आहे. भूकंपाची तीव्रता प्रचंड असल्याने कुरिल बेटांसाठी त्सुनामीचा इशारा जारी करण्यात आला आहे. हा त्सुनामीचा इशारा जपानपासून ते अमेरिकेतील कॅलिफोर्नियापर्यंतच्या किनारी भागांसाठी देण्यात आला आहे, ज्यामुळे प्रशांत महासागरातील अनेक देशांमध्ये चिंता वाढली आहे.
त्सुनामीचा इशारा
यूएस त्सुनामी वॉर्निंग सेंटरने दिलेल्या माहितीनुसार, पुढील तीन तासांत रशिया आणि जपानच्या काही भागांत धोकादायक त्सुनामी लाटा पोहोचण्याची शक्यता आहे. याशिवाय, फिलिपिन्स, मार्शल बेटे, पलाऊ आणि इतर बेटांवरही कमी तीव्रतेच्या लाटा अपेक्षित आहेत. किनारी भागातील रहिवाशांना सुरक्षित ठिकाणी स्थलांतरित होण्याचे आवाहन करण्यात आले आहे.
सद्यस्थिती आणि बचावकार्य
आतापर्यंत या भूकंपात कोणतीही जीवितहानी झाल्याची माहिती नाही, मात्र एका बालवाडीचे नुकसान झाले आहे. रशियाच्या सखालिन प्रदेशातील सेवेरो-कुरिलस्क या छोट्या शहरात बचावकार्य सुरू आहे. स्थानिक प्रशासन परिस्थितीवर बारकाईने लक्ष ठेवून आहे आणि आवश्यक ती पाऊले उचलत आहे.
भूकंपाची तीव्रता खूप जास्त असल्याने, यामुळे मोठ्या प्रमाणावर नुकसान होण्याची भीती व्यक्त केली जात आहे.