प्रियकरासोबत रंगेहाथ सापडल्याने पतीची हत्या करणाऱ्या पत्नीला अटक

घरातच गाडले, भावानेच घरातील फरशा बदलल्या

नालासोपारा : नालासोपारा येथे प्रियकरासोबत रंगेहाथ पकडले गेल्यानंतर झोपेत असलेल्या पतीचा गळा दाबून खून केल्याची धक्कादायक घटना उघडकीस आली आहे. ५ जुलैच्या रात्री ३४ वर्षीय विजय चौहान याची हत्या करण्यात आली.

पोलिसांनी दिलेल्या माहितीनुसार, आरोपी गुडिया देवी उर्फ चमन (२८) हिचे २३ वर्षीय मोनू विश्वकर्मासोबत दीर्घकाळापासून अनैतिक संबंध होते. घटनेच्या रात्री विजय अनपेक्षितपणे घरी परतला आणि त्याने दोघांना नको त्या अवस्थेत एकत्र पाहिले. यामुळे त्यांच्यात जोरदार भांडण झाले, ज्यात विजयने चमनला मारहाण केल्याचा आरोप आहे. त्यानंतर, विजय झोपलेला असताना, चमनने रागाच्या भरात, परिणामांच्या भीतीने आणि आपले प्रेमसंबंध लपवण्यासाठी त्याचा गळा दाबून खून केल्याचा आरोप आहे.

पोलिसांनी सांगितले की, चमनने लगेचच एकटीने हे कृत्य केले नाही. विश्वकर्मा याने तिला गुन्हा लपवण्यात मदत केली. या दोघांनी विजयचा मृतदेह पुन्हा पलंगावर ठेवला आणि एका चादरीने झाकून ठेवला, जेणेकरून घरात उपस्थित असलेल्या चमनच्या पाच वर्षांच्या मुलाला काही संशय येऊ नये. दुसऱ्या दिवशी, त्यांनी पाणी टाकी बसवण्याच्या बहाण्याने मजूर बोलावले आणि त्यांना घरात सहा फूट लांब, चार फूट खोल खड्डा खोदण्यास सांगितले. त्यानंतर त्यांनी मृतदेह खड्ड्यात पुरला आणि तो भाग सिमेंटने बंद केला.

विजयचे कुटुंबीय त्याच्या अचानक बेपत्ता झाल्याबद्दल संशय आल्यावर, चमनने आपला फोन बंद केला आणि नालासोपारा सोडून पळून गेली. मात्र, गेल्या आठवड्यात तिने चुकून आपला फोन चालू केल्यावर ती पकडली गेली. पोलिसांनी तिचा शोध घेऊन पुणे जिल्ह्यातील हडपसर परिसरातून तिला ताब्यात घेतले. म्हाडा कॉलनीतील ३,००० हून अधिक घरांचा कसून शोध घेतल्यानंतर, त्यांनी तिला एका मेडिकल दुकानावर शोधून अटक केली.

ती पुण्यातील एका स्थानिक ऑटो-रिक्षा चालकाच्या मदतीने भाड्याच्या खोलीत राहत होती. त्यानंतर विश्वकर्मा यालाही अटक करण्यात आली. दोन्ही आरोपींना बुधवारी वसई न्यायालयात हजर करण्यात आले असून, त्यांना ३० जुलैपर्यंत पोलीस कोठडी सुनावण्यात आली आहे.

अनेक धक्कादायक बाबी आल्या समोर

नालासोपारामध्ये पत्नी आणि तिच्या प्रियकराने पतीची हत्या केल्याच्या प्रकरणात अनेक धक्कादायक बाबी समोर आल्या आहेत. १९ तारखेला कोमल आणि मोनू हे दोघं आधी नालासोपारा स्टेशनवर गेले. जिथे त्यांच्यासोबत कोमलचा ५ वर्षांचा मुलगाही होता. तिघांनी नालासोपारा स्टेशनवरून ट्रेन पकडून दादर गाठले. दादरहून ते बसने पुण्याला रवाना झाले. पुण्यामध्ये ते काही दिवस एका घरात बेकायदेशीरपणे राहत होते, अशी माहिती समोर आली आहे

आरोपींचे ठिकाण पोलिसांना कसे सापडले?

आरोपींनी मृत विजयच्या फोनमधून सिमकार्ड काढून ते स्वतःच्या फोनमध्ये टाकले होते. ज्याचा उद्देश बँक ट्रान्झॅक्शनसाठी ओटीपी (OTP) तयार करणे हा होता. जेव्हा आरोपी येथून पळून गेले, तेव्हापासून त्यांचे फोन बंद होते, परंतु पुण्याला जाऊन ट्रान्झॅक्शन करण्यासाठी ओटीपी पुन्हा तयार करण्यात आला. पोलिसांनी त्या ओटीपीच्या मेसेजवरून पुण्यातील ठिकाण शोधले. त्यानंतर, त्या परिसरात जाऊन लोकांना फोटो दाखवले आणि आरोपींना पकडले.

विजयच्या भावानेच घरातील फरशा बदलल्या

या प्रकरणात आणखी एक धक्कादायक माहिती उघड झालीय. त्यामध्ये विजयच्या घरातील फरशा (Tiles) त्याच्या मोठ्या भावाने, अजयनेच बदलल्या होत्या. ही माहिती विजयच्या भावाने, अजयनेच पोलिसांना दिली आहे. परंतु त्याला याची कल्पना नव्हती की ज्या फरशा बदलल्या जात आहेत, त्याखाली त्याच्या भावाचा मृतदेह पुरला आहे आहे.

सोमवारी सकाळी विजयचे दोन्ही भाऊ त्याच्या घरी पोहोचले असता त्यांना घरातील फरशा (टाइल्स) वेगवेगळ्या रंगाच्या दिसल्या. त्यांनी फरशा काढल्या असता त्यांना एक बनियान (सँडो) दिसले आणि तिथून प्रचंड दुर्गंधी येत होती. त्यांनी तात्काळ या घटनेची माहिती पोलिसांना दिली. पेल्हार पोलीस घटनास्थळी दाखल झाले आणि त्यांनी माती व इतर मलबा बाजूला करून मृतदेह बाहेर काढला. त्यानंतर पोलिसांनी फरार आरोपींचा शोध सुरू केला. पोलिसांनी फरार आरोपींना अटक केली. त्यानंतर त्यांच्या चौकशीत हा खुलासा झाला आहे.