मँचेस्टर: इंग्लंड आणि भारत यांच्यातील चौथ्या कसोटी सामन्याच्या तिसऱ्या दिवसाचा खेळ संपला आहे. तिसऱ्या दिवसअखेर इंग्लंडने पहिल्या डावात ७ बाद ५४४ धावा केल्या आहेत. इंग्लंडकडे सध्या १८६ धावांची आघाडी आहे. या सामन्यात ज्यो रूटने रेकॉर्ड ब्रेक कामगिरी केली. त्याने दीडशतक ठोकले.
इंग्लंडचा संघ पाच कसोटी सामन्यांच्या मालिकेत २-१ अशा आघाडीवर आहे. अशातच शुभमन गिलच्या नेतृत्वातील टीम इंडियासाठी हा चौथा कसोटी सामना करो वा मरोसारखा आहे. जर भारतीय संघाने हा सामना गमावला तर इंग्लंडचा संघ ही मालिका आपल्या नावे करेल.
इंग्लंडच्या पहिल्या डावात बेन डकेट आणि जॅक क्राऊली यांनी मिळून संघाला शानदार सुरूवात करून दिली. दोघांनी पहिल्या विकेटसाठी १६६ धावांची भागीदारी केली. बेन डकेटने १०० बॉलमध्ये ९४ धावा केल्या. यात १३ चौकारांचा समावेश आहे. जॅक क्राऊलीने ८४ धावांचे योगदान दिले. यात १३ चौकारांशिवाय एका षटकाराचा समावेश होता. रवींद्र जडेजाने जॅक क्राऊलीला बाद केले. तर अंशुल कम्बोजने डकेटची विकेट घेतली.
तिसऱ्या दिवसाच्या खेळात भारतीय गोलंदाजांकडून चांगल्या खेळीची अपेक्षा होती. मात्र त्यांचे पहिले सत्र खूप खराब ठरले. पहिल्या सत्रात भारतीय गोलंदाजांना एकही विकेट मिळवता आली नाही. या दरम्यान, ज्यो रूट आणि ओली पोपने भारतीय संघाला एकही संधी दिली नाही. रूटने ६ चौकारांच्या मदतीने ९९ बॉलवर आपले अर्धशतक पूर्ण केले. तर पोपने ५० धावांचा आकडा गाठण्यासाठी ९३ बॉल घेतले. यात त्याने ६ चौकार लगावले.
लंचनंतर वॉशिंग्टन सुंदरने एकामागोमाग एक विकेट मिळवल्या. सुंदरने सगळ्यात आधी ओली पोपला बाद केले. त्याने ७१ धावा केल्या. पोप आणि ज्यो रूट यांच्यात तिसऱ्या विकेटसाठी १४४ धावांची भागीदारी केली. सुंदरने हॅरी ब्रूकला ३ धावांवर स्टम्प आऊट केले.
