ढाका: बांग्लादेशची राजधानी ढाका येथे झालेल्या विमान अपघातानंतर या अपघातातील मृत आणि जखमींच्या कुटुंबियांना मदत करण्यासाठी देशाचे प्रमुख मोहम्मद युनूस यांनी फेसबुक पोस्टद्वारे देशवासीयांना दान देण्याचे आवाहन केले होते. मात्र, युनूस यांच्या या पोस्टमुळे बांग्लादेशमध्ये राजकीय गोंधळ निर्माण झाला. अपघातातील बळींना मदत करण्यासाठी युनूस सरकारकडे पैसे नसल्यावरुन अनेकांनी टीका केली. हा वाद इतका वाढला की, मोहम्मद युनूस यांना ही फेसबुक पोस्ट ताबडतोब डिलीट करावी लागली.
मोहम्मद युनूस यांनी त्यांच्या फेसबुक पोस्टमध्ये नागरिकांना "मुख्य सल्लागार मदत आणि कल्याण निधी" मध्ये देणगी देण्याचे आवाहन केले होते.मीडिया रिपोर्टनुसार, ही पोस्ट २२ जुलै २०२५ रोजी दुपारी २:०० नंतर टाकण्यात आली होती. ही फेसबुक पोस्ट मोहम्मद युनूस यांचे वरिष्ठ सहाय्यक प्रेस सचिव फयज अहमद यांनी प्रेस विंगच्या अधिकृत व्हॉट्सअॅप ग्रुपमध्ये देखील शेअर केली होती.ज्यामुळे ही पोस्ट अधिकृत खात्यातूनच केली गेली होती यावर शिक्कामोर्तब करण्यात आले.
विमान दुर्घटनेनंतरच्या या पोस्टवर अनेक लोकांनी युनूस सरकारवर टीका केली. अपघातातील पीडितांना मदत करण्यासाठी सरकारकडे पुरेसा निधी नाही का? असा सवालही उपस्थित करण्यात आला.अनेक राजकीय पक्षांसह सामान्य लोकांनी युनूसवर हल्लाबोल केला. हा वाद इतका वाढला की शेवटी कोणतेही कारण न देता मोहम्मद युनूस यांनी तात्काळ ती फेसबुक पोस्ट हटवली.
