मुंबई : राष्ट्रवादी काँग्रेस शरदचंद्र पवार पक्षाचे सरचिटणीस आणि आमदार रोहित पवार यांच्यावर आझाद मैदान पोलीस ठाण्यात गुन्हा नोंदवण्यात आला आहे. पोलिसांना दमबाजी करणे, पोलीस ठाण्यात जाऊन पोलिसांनाच आवाज चढवू नको असे मोठ्या आवाजात बोलणे रोहित पवारांना भोवले आहे. आझाद मैदान पोलीस ठाण्यातील पोलिसांशी गैरवर्तन करणे आणि सरकारी कामात अडथळा आणणे यासाठी गुन्हा नोंदवण्यात आला आहे.
राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड आणि भारतीय जनता पार्टीचे आमदार गोपीचंद पडळकर यांच्या कार्यकर्त्यांमध्ये विधानभवनात हाणामारी झाली. यानंतर पोलिसांनी हाणामारी प्रकरणी आव्हाडांच्या समर्थकाला अटक केली. या समर्थकाची सुटका व्हावी यासाठी आधी आव्हाडांनी निवडक कार्यकर्त्यांसोबत जाऊन रस्त्यात पोलिसांची गाडी अडवली. पण पोलिसांनी आव्हाड आणि त्यांच्या समर्थकांना बाजूला करुन पुढील कारवाई सुरू केली. पोलीस कार्यकर्त्याला सोडत नसल्याचे बघून आव्हाड थेट पोलीस ठाण्यात धडकले. तिथे राष्ट्रवादी काँग्रेस शरदचंद्र पवार पक्षाचे सरचिटणीस आणि आमदार रोहित पवार पण पोहोचले. पोलीस ठाण्यात रोहित पवार आणि पोलीस अधिकारी यांच्यात वाद झाला होता. यावेळी रोहित पवारांनी पोलिसांना दमबाजी केली. या घटनेचे व्हिडीओ व्हायरल झाले. आता या प्रकरणात रोहित पवारांविरुद्ध गुन्हा नोंदवण्यात आला आहे.
याआधी राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांच्या विरोधातही पोलिसांनी गुन्हा नोंदवला आहे. आव्हाडांच्या विरोधातही सरकारी कामात अडथळा आणण्याचा गुन्हा नोंदवण्यात आला आहे.
