अमृतसर : पंजाबच्या अमृतसर येथील सुवर्ण मंदिर आणि दुर्ग्याना मंदिरावर बॉम्ब हल्ल्याची धमकी देणारे पत्र पाठवण्यात आले आहे. पाकिस्तानी दहशतवादी संघटना जैश-ए-मोहम्मदच्या नावानी लिहीलेले हे धमकीचे पत्र अमृतसर रेल्वे स्टेशनच्या अधीक्षकांना मिळाले आहे. त्यानंतर पोलिसांनी धार्मिक स्थळांभोवती आणि शहरातील सुरक्षा व्यवस्था कडक केली आहे. रेल्वे स्टेशनसह इतर सार्वजनिक ठिकाणी मोठा पोलिस बंदोबस्त तैनात करण्यात आला आहे.
याबाबत पोलिस आयुक्त सुधांशू शेखर श्रीवास्तव यांच्या आदेशानुसार सुवर्ण मंदिर आणि दुर्गायन मंदिराची सुरक्षा कडक करण्यात आली आहे. तिथे जाणाऱ्या प्रत्येक व्यक्तीवर लक्ष ठेवले जात आहे. डीसीपी (कायदा आणि सुव्यवस्था) अमरिक सिंग पवार यांनी शहरातील रहिवाशांना पोलिसांना सहकार्य करण्याचे आणि अफवा पसरवणाऱ्यांबद्दल तात्काळ पोलिसांना माहिती देण्याचे आवाहन केले आहे. तब्बल 2 पानांचे हे पत्र हिंदी भाषेमध्ये लिहिले आहे.
पत्र लिहिणाऱ्याने स्वतःला जैश-ए-मोहम्मद या दहशतवादी संघटनेचा एरिया कमांडर तस्लीम मौलवी असे म्हंटले आहे. तसेच त्याने आपले पत्ता जम्मू-काश्मीर आणि पाकिस्तानचे कराची असा नमूद केला आहे. पत्रात लिहिले आहे की त्यांची संघटना कोणत्याही परिस्थितीत अमरनाथ यात्रा होऊ देणार नाही. या यात्रेत सहभागी होणाऱ्या कोणत्याही हिंदू किंवा शीख व्यक्तीला जम्मू मध्येच बॉम्बने उडवून दिले जाईल.' पत्रात लिहिले आहे की, 'आम्ही इशारा देत आहोत की कोणीही अमरनाथ यात्रा करू नये. लवकरच जम्मू रेल्वे स्टेशन, पठाणकोट, अमृतसर, फिरोजपूर, जयपूर, जोधपूर आणि बिकानेर रेल्वे स्थानके बॉम्बने उडवून दिली जातील. यासोबतच, अमृतसरचे सुवर्ण मंदिर आणि दुर्ग्याना मंदिर देखील उद्ध्वस्त केले जाईल. लवकरच, जम्मू-काश्मीर आणि पंजाबची भूमी रक्ताने रंगवली जाईल असा इशारा देण्यात आलाय.