नाशिक: नाशिक जिल्ह्यातील चांदवड येथे एक हृदयद्रावक घटना घडली आहे. इयत्ता दहावीत शिकणाऱ्या प्रवीण धायगुडे (वय १५) या विद्यार्थ्याचा घरी व्यायाम करत असताना हृदयविकाराच्या झटक्याने मृत्यू झाला. या घटनेमुळे संपूर्ण परिसरात हळहळ व्यक्त होत आहे.
मिळालेल्या माहितीनुसार, प्रवीण दररोजप्रमाणे घरी व्यायाम करत होता. व्यायाम करत असताना त्याला अचानक अस्वस्थ वाटू लागले आणि तो जमिनीवर कोसळला. प्रवीण खाली पडल्याचा आवाज ऐकून त्याच्या कुटुंबीयांनी धाव घेतली. त्यांनी तातडीने प्रवीणला नजीकच्या रुग्णालयात दाखल केले, परंतु डॉक्टरांनी त्याला मृत घोषित केले.
प्रवीणच्या अकाली निधनाने धायगुडे कुटुंबावर दुःखाचा डोंगर कोसळला आहे. चांदवड पोलिसांनी या घटनेची आकस्मिक मृत्यू म्हणून नोंद केली असून पुढील तपास सुरू आहे.
वजन कमी करण्याच्या प्रयत्नात आणखी एकाचा जीव गेला
काही दिवसांपूर्वी अशीच एक दुर्दैवी घटना घडली होती, जिथे वजन कमी करण्याच्या प्रयत्नात एका तरुणाला आपला जीव गमवावा लागला. पंकज शर्मा (वय ३७) नावाचा हा तरुण जिममध्ये व्यायाम करत असताना त्याला तीव्र हृदयविकाराचा झटका आला आणि त्यातच त्याचा मृत्यू झाला. सकाळी जिममध्ये गेल्यावर पंकजने ब्लॅक कॉफी प्यायली आणि त्यानंतर खांद्यावर पुल-अप व्यायाम सुरू केला. तिसऱ्यांदा पुल-अप करण्याचा प्रयत्न करत असतानाच तो कोसळला. जिममधील इतरांनी त्याला सीपीआर देण्याचा प्रयत्न केला, परंतु त्याला वाचवता आले नाही.
व्यायाम करताना तरुण व्यक्तींना येत असलेले हृदयविकाराचे झटके ही एक गंभीर चिंतेची बाब बनली आहे. या घटनांमुळे व्यायाम करताना योग्य काळजी घेण्याचे आणि डॉक्टरांचा सल्ला घेण्याचे महत्त्व अधोरेखित होते.
