मुंबई : मुंबई शहर आणि उपनगरात अनेक झोपडपट्ट्या अशा आहेत, ज्या डोंगरावर किंवा डोंगर उतारावर वसल्या आहेत. त्यापैकीच एक म्हणजे मुलुंड पश्चिमेकडील पंचशील नगर एक दरडप्रवण क्षेत्र आहे. महापालिकेने घोषित केलेल्या संवेदनशील दरडप्रवण ठिकाणांमध्ये पंचशील नगरचा समावेश आहे. पंचशील नगर येथील झोपड्या काही कच्च्या तर काही पक्क्या बांधकाम केलेल्या आहेत. हजारो लोकांनी येथील झोपड्यांमध्ये संसार थाटले आहेत. दरवर्षी पावसाळ्यात अतिवृष्टीमुळे येथील डोंगर भागातील माती आणि दगड कोसळण्याच्या घटना घडतच असतात. यासाठी पालिकेतर्फे एप्रिल मे महिन्याच्या सुरुवातीलाच या भागातील झोपड्यांवर ‘सदर ठिकाण धोक्याचे आहे, तातडीने स्थलांतर करावे’, अशी नोटीस महापालिकेचे अधिकारी चिकटवून जातात.
पंचशीलनगर या दरडप्रवण क्षेत्रात राहणाऱ्या नागरिकांना विविध अडचणींचा, समस्यांचा सामना करावा लागतो. माती सरकणे, दगड कोसळणे, भिंती पडणे यासारख्या घटना घडतात. त्यामुळे जीवितहानी व मालमत्तेच्या नुकसानीचा धोका अधिक असतो. येथील बहुतेक घरे ही झोपडपट्टी स्वरूपाची आहेत. त्यामुळे या घरात पावसाळ्यात पाणी गळती व पडझड होण्याची शक्यता अधिक असते. येथे पायाभूत सुविधांचा अभाव आहे. आरोग्याच्या समस्या, स्वच्छ पिण्याच्या पाण्याचा अभाव, वीज व शौचालय सुविधांचा अभाव यासारख्या समस्यांचा येथील रहिवाशांना रोजच सामना करावा लागतो. परंतु यावर उपाययोजना करत नाही ही खंत व्यक्त होत आहे.
उपाययोजना करायला हव्या
- दरड कोसळण्याची शक्यता असलेल्या ठिकाणी मजबूत रिटेनिंग वॉल्स उभारण्याची आवश्यकता आहे.
- जिथे भिंती तुटल्या आहेत, तिथे तत्काळ दुरुस्ती करून मातीचा निचरा आणि नालेसफाई योग्य पद्धतीने व्हावी.
- डोंगर उतारावरून पाण्याचा निचरा व्यवस्थित व्हावा यासाठी स्टॉर्म वॉटर ड्रेनेज यंत्रणा तयार करावी.
- डोंगर उताराची माती किती ठिसूळ आहे, हे जाणून घेण्यासाठी जिओ टेक इंजिनीअरिंग चाचणी करावी.
- पावसाळ्यात या परिसरात एनडीआरएफ व पालिकेची टीम सज्ज ठेवावी.