'कांटा लगा...' फेम शेफालीचे निधन, घरी पोहोचली फॉरेन्सिक टीम

मुंबई : तरुणांमध्ये लोकप्रिय असलेली अभिनेत्री शेफाली जरीवाला हिचे ४२ व्या वर्षी हृदयविकाराच्या झटक्याने निधन झाले. 'मुझसे शादी करोगी' या चित्रपटातील 'कांटा लगा' या गाण्यामुळे ती लोकप्रिय झाली होती. शेफालीच्या मृत्यूनंतर थोड्याच वेळात तिच्या घरी फॉरेन्सिक टीम पोहोचली आहे. मृत्यूच्या कारणाचा शोध घेण्यासाठी फॉरेन्सिक टीम शेफालीच्या घरातून नमुन्यांचे (सँपल्स) संकलन करत आहे. बॉलिवूड फोटोग्राफर विरल भैयानीने सोशल मीडिया अकाउंटवर व्हिडीओ शेअर करुन ही माहिती दिली आहे.



शेफाली जरीवाल तरुणांमध्ये खूप लोकप्रिय होती. तिचा जन्म अहमदाबादमध्ये झाला. तिला एका गाण्याने रातोरात लोकप्रिय केले. आशा पारेख यांच्या 'कांता लगा' या चित्रपटातील गाण्याचा म्युझिक व्हिडिओ २००२ मध्ये तिने रिक्रिएट केला. हे गाणे 'मुझसे शादी करोगी' या चित्रपटात वापरले होते. युट्यूबवर त्याला सुमारे १०० दशलक्ष व्ह्यूज मिळाले आहेत. जेव्हा हे गाणे आले तेव्हा त्याला खूप लोकप्रियता मिळाली आणि त्याला विरोधही सहन करावा लागला. शेफालीचा हा व्हिडिओ इतका हिट झाला की तिची ओळख 'कांटा लगा गर्ल' अशी झाली. तिने सलमान खानच्या लोकप्रिय शो 'बिग बॉस १३' मध्येही भाग घेतला. तिने तिच्या कारकिर्दीतील एकमेव हिंदी चित्रपट 'मुझसे शादी करोगी' केला. त्याच वेळी ती 'हुडुगारू' नावाच्या कन्नड चित्रपटाचा भाग होती.

अंधेरीच्या लोखंडवाला भागात राहणाऱ्या शेफालीने शुक्रवारी (२७ जून २०२५) रात्री ११ वाजता छातीत दुखत असल्याची तक्रार केली. शेफालीचा पती पराग त्यागी याने तिला जवळच्या रुग्णालयात नेले. डॉक्टरांनी तपासणी करताच शेफालीचा मृत्यू झाल्याचे सांगितले. यानंतर शेफालीचा मृतदेह शवविच्छेदनासाठी कूपर रुग्णालयात पाठवण्यात आला. शेफालीने ३ दिवसांपूर्वी एक फोटोशूट केले होते. नंतर ती घरीच होती. यामुळे शेफालीला नेमके काय झाले याचा तपास सुरू आहे. शेफालीच्या घरी फॉरेन्सिक टीम पोहोचली आहे.