एचडीएफसी बँकेच्या समुहाशी संलग्न असलेल्या या विना बँक वित्तीय संस्थेचा (NBFC) जलवा बाजारात पहायला मिळाला. एकूण १२५०० कोटींच्या आयपीओला तुंबळ प्रतिसाद मिळाल्याने या आयपीओतील समभागावर मूळ निश्चित (Issue Price) किमतीपेक्षा ८% प्रिमियम दरात हा समभाग विकला जात आहे. बाजार अभ्यासकांचा मते, हा शेअर ५४ रूपये प्रति समभाग विकला जात आहे. म्हणजेच जवळपास ७४० रूपयांच्या मूळ किंमतीपेक्षा अधिक दराने (७९४ रूपये) विकला जात आहे. वाढलेल्या मागणीमुळे कंपनीच्या ग्रे मार्केटमध्ये (Grey Market Price GMP) हा शेअर ८% अधिक दराने ग्राहक विकत आहेत.
एचडीएफसी बँकेचा स्वतः चे ९४% भागभांडवल हिस्सा आयपीओपूर्वी होता. आयपीओनंतर ते घटून ७४.१९% भागभांडवल (Stake) होऊ शकतो. कंपनीने आयपीओसाठी ७०० ते ७४० रूपये प्रति समभाग प्राईज बँड (Price Band) निश्चित केला होता. ३० तारखेला कंपनीच्या समभागांची अंतिम वाटप अपेक्षित आहे. कंपनीने एकूण १७.६५ पटीने सबस्क्रिप्शन मिळवले आहे ज्यामध्ये १.५१ पटीने किरकोळ गुंतवणूकदारांनी (Retail Investors), तसेच पात्र संस्थात्मक गुंतवणूकदार (QIB) यांनी ५८.६४ वाटा, १०.५५ वाटा विना संस्थात्मक गुंतवणूकदार (NII) यांनी सबस्क्राईब केला होता.
कंपनीच्या आयपीओला जोरात प्रतिसाद मिळाल्याने आगामी काळात हा मोठ्या प्रिमियम दराने बाजारात सूचीबद्ध होण्याची शक्यता वर्तवली जात आहे. बहुतांश बाजार विश्लेषकांनी हा आयपीओ दिर्घकालीन गुंतवणूकीसाठी सबस्क्राईब करण्याचा सल्ला दिला होता. कंपनी मुख्यतः आर्थिक सेवा, सुविधा तसेच ग्राहकांना कर्जपुरवठा करते. २ जुलैला हा शेअर बाजारात सूचीबद्ध (Listed) होणार आहे. मात्र आगामी काळात ३० हून अधिक आयपीओ बाजारात येण्याची शक्यता असल्याने आयपीओला सुगीचा काळ दिसत आहे. मात्र आतापर्यंत इतर निवडक आयपीओला चांगला प्रतिसाद मिळत असताना एचडीबीने नवा इतिहास रचत चार वर्षांत मोठी मजल मारली आहे. विशेषतः मुख्य प्रवाहातील आयपीओ (Mainstream IPO) असल्याने आयपीओ बाजारात बळकटी येऊ शकते.
