पिंपरी : महानगरपालिकेच्या बांधकाम विभागातील उपअभियंता दिनेश फाटक आणि कनिष्ठ अभियंता संभाजी गायकवाड यांनी तत्कालीन आयुक्त श्रावण हार्डिकर यांचा मनाई आदेश असतानाही मोशी येथील गट क्रमांक ४४४ /१/ १ /१ चा डी आर सी ( विकास हक्क प्रमाणपत्र Devlopment Right सर्टिफिकेट) रावेत प्राधिकरण येथे वापरून चुकीच्या पद्धतीने परवानगी देऊन करोडो रुपयांचा घोटाळा केला असल्याचे उघड झाल्याने महापालिका आयुक्त शेखर सिंह यांनी फाटक आणि गायकवाड यांची पाणी पुरवठा विभागात तडका फडकी बदली केली आहे, तसेच त्यांच्या विभागीय चौकशीचे आदेश दिले आहेत.
पिंपरी चिंचवड महापालिका बांधकाम विभागामध्ये उपअभियंता दिनेश फाटक आणि कनिष्ठ अभियंता संभाजी गायकवाड हे कर्मचारी कार्यरत असून त्यांनी मोशी येथील गट क्रमांक ४४४/१/ १ /१ या मिळकतीचा डी आर सी ( विकास हक्क प्रमाणपत्र ) क्रमांक ३२0४ हे रावेत प्राधिकरण से.न. २९ प्लॉट ३३,३४,३४अ या मिळकतीवर बेकायदापणे वापरून महापालिकेचे करोडो रुपयाचे नुकसान केले आहे. विशेष म्हणजे मोशी येथील या मिळकतीचा डी आर सी वापरू नये असे तत्कालीन आयुक्त श्रावण हर्डीकर यांनी एका आदेशाद्वारे बांधकाम विभागाला कळविले असताना वरिष्ठ आधिकाऱ्यांची दिशाभूल करून हे कृत्य केल्याने महापालिकेचे नुकसान तर झालेच आहे शिवाय बदनामीही झाली आहे.
याप्रकरणी आयुक्त शेखर शिंह यांच्याकडे तक्रार आल्याने आयुक्तांनी संबंधित अधिकाऱ्याकडे खुलासा मागविला असता समाधानकारक उत्तर न आल्याने आयुक्तांनी उप अभियंता दिनेश फाटक आणि कनिष्ठ अभियंता संभाजी गायकवाड यांची बांधकाम विभागातून तडका फडकी पाणी पुरवठा विभागात बदली केली असून त्या दोघांची विभागीय चौकशी करण्याचे आदेशही दिले आहेत.