नवी दिल्ली : देशातील पहिली आणि सर्वात मोठी टेनिस बॉल टी-१० क्रिकेट लीग इंडियन स्ट्रीट प्रीमियर लीगच्या तिसऱ्या हंगामापूर्वी एक मोठी घोषणा करण्यात आली आहे. बॉलिवूड सुपरस्टार सलमान खान आता आयएसपीएल मधील नवी दिल्ली फ्रेंचायझीचे मालक असणार आहेत. ही नवी टीम आयएसपीएल मध्ये अशा वेळी सामील झाली आहे, जेव्हा या लीगने आपल्या दुसऱ्या हंगामात प्रचंड लोकप्रियता मिळवली आहे. आयएसपीएल हंगाम २ ने टीव्हीवर २.८ कोटींहून अधिक प्रेक्षकांपर्यंत पोहोचले आणि पहिल्या सीझनच्या तुलनेत ४७ टक्के वाढ झाली. यामुळे आयएसपीएल मधील रोमांच वाढला आहे.
सलमान खानच्या सामील होण्यामुळे केवळ नवी दिल्ली संघच बळकट होणार नाही, तर संपूर्ण लीगला एक नवीन ओळख मिळणार आहे. आता तो अशा सेलिब्रिटींच्या यादीत सामील झाला आहे, ज्यांच्याकडे आधीच इतर आयएसपीएल संघ आहेत. यामध्ये अमिताभ बच्चन (माझी मुंबई), सैफ अली खान आणि करीना कपूर खान (टायगर्स ऑफ कोलकाता), अक्षय कुमार (श्रीनगर के वीर), सूर्या (चेन्नई सिंघम्स), हृतिक रोशन (बंगलोर स्ट्रायकर्स) आणि राम चरण (फाल्कन रायझर्स हैदराबाद) अशी नावे आहेत. अभिनेता सलमान खान यांनी आपल्या भावना व्यक्त करताना म्हटले की, क्रिकेट ही प्रत्येक भारतीय गल्लीची ओळख आहे. आणि जेव्हा हीच ऊर्जा स्टेडियमपर्यंत पोहोचते, तेव्हा आयएसपीएल सारख्या लीगचा जन्म होतो. मी कायमच क्रिकेटबद्दल अत्यंत उत्साही राहिलो आहे आणि आता आयएसपीएल सोबत जोडला गेल्याचा मला खूप आनंद आहे. ही लीग केवळ स्थानिक स्तरावरचा क्रिकेट पुढे नेत नाही, तर प्रतिभावान खेळाडूंना एक मजबूत आणि व्यापक मंच देखील उपलब्ध करून देते. ही तर फक्त सुरुवात आहे.
