पहिल्या कसोटीच्या पहिल्या डावात कर्णधार शुभमन गिल १२७ धावांवर आणि यष्टीरक्षक फलंदाज रिषभ पंत ६५ धावांवर खेळत आहे. याआधी सलामीवीर यशस्वी जयस्वाल १०१ धावांची शानदार खेळी करुन परतला आहे. केएल राहुलने ४२ धावा केल्या तर साई सुदर्शन शून्य धावा करुन बाद झाला आहे. इंग्लंडचा कर्णधार बेन स्टोक्सने यशस्वी जयस्वाल आणि साई सुदर्शनला बाद केले तर ब्रायडन कार्सेने केएल राहुलला बाद केले. भारत सध्या सुस्थितीत आहे. पण कर्णधार गिलला कसोटी क्रिकेटच्या ड्रेस कोडचे (वेशभूषेसाठीचे नियम) उल्लंघन केल्यामुळे दंडात्मक कारवाईला सामोरे जावे लागण्याची शक्यता आहे.
शुभमन गिल फलंदाजीसाठी आला त्यावेळी पांढऱ्या रंगाऐवजी चुकून काळ्या रंगाचे मोजे घालून मैदानात आला. कसोटी क्रिकेटच्या नियमानुसार मैदानात पांढऱ्या रंगाचे मोजे वापरणे आवश्यक होते. यामुळे नियमाचे उल्लंघन केल्याप्रकरणी गिलला सामन्याच्या मानधनाच्या दहा ते वीस टक्क्यांपर्यंतची रक्कम दंड म्हणून भरावी लागण्याची शक्यता आहे. गिलने चुकून अथवा पांढरे मोजे ओले असल्यामुळे काळ्या रंगाचे मोजे वापरले असतील तर त्याला दंडात्मक कारवाईतून सूट मिळू शकते. पण यासाठी गिलला त्याची बाजू मांडावी लागेल. त्याचे म्हणणे ऐकल्यानंतर सामनाधिकाऱ्यांनी ते मुद्दे स्वीकारले तरच गिलला कारवाईतून सूट मिळू शकते.
