हिंदी चित्रपटसृष्टीत आपल्या दमदार अभिनयाद्वारे, बॉलीवूडमध्ये विशेष छाप सोडल्यानंतर प्रियंका चोप्रा गेल्या अनेक वर्षांपासून हॉलिवूडमध्ये आपले नशीब आजमावत आहे. प्रियांकाने हॉलिवूड इंडस्ट्रीत आपली खास ओळख निर्माण केली असून, आपल्या कामाच्या जोरावर आंतरराष्ट्रीय प्रेक्षकांनादेखील आपले चाहते बनवले आहे.
नुकतेच प्रियांकाने तिच्या आगामी चित्रपट हेड्स ऑफ स्टेटच्या शूटिंगदरम्यान घडलेला एक किस्सा सांगितला. या सिनेमाच्या सेटवर ती थोडक्यात बचावली (Priyanka Chopra Injured While Shooting) असल्याचे तिने सांगितले.
हेड्स ऑफ स्टेटच्या सेटवर अपघात
प्रियांका चोप्राचा आगामी चित्रपट हेड्स ऑफ स्टेट लवकरच प्रदर्शित होणार आहे. तिने तिच्या चित्रपटाचे प्रमोशनही सुरू केले आहे. याच दरम्यान तिने तिचे सह-कलाकार जॉन सीना आणि इदरीस एल्बा यांच्यासोबत जिमी फॉलनच्या चॅट शो द टुनाइट शोमध्ये हजेरी लावली. यावेळी प्रियंकाने चित्रपटाच्या सेटवर तिच्यासोबत घडलेल्या एका मोठ्या अपघाताबद्दल खुलासा केला. तिने सांगितले की, शूटिंगदरम्यान तिची भुवई कापली गेली होती.
थोडक्यात बचावला डोळा
प्रियांका चोप्राने सांगितले, “कॅमेऱ्यात मॅट बॉक्स होता आणि मला जमिनीवर लोळत पडायचे होते. पाऊस पडत होता. कॅमेरा माझ्या जवळ येणार होता.” देसी गर्लच्या म्हणण्यानुसार, शूटिंगदरम्यान तिला क्लोज शॉट द्यायचा होता आणि कॅमेरा ऑपरेटर काही जास्तच जवळ आला. तीही कॅमेऱ्याच्या थोड्या जास्त जवळ गेली. त्यामुळे कॅमेऱ्याचा कोपरा तिच्या भुवईला लागला आणि तिची अर्धी भुवईच कापली गेली. अभिनेत्रीने याबद्दल कृतज्ञता व्यक्त केली की भुवईच्या जागी तिचा डोळा असता तर मोठा अपघात झाला असता. त्यामुळे थोडक्यात अनर्थ टळल्याचे तिने सांगितले. मात्र या परिस्थितीतही तिने आपले काम पूर्ण केले, कारण तिला पुन्हा पावसात शूटिंग करायचे नव्हते.
प्रियांकाचा आगामी हेड्स ऑफ स्टेट हा एक ॲक्शन-कॉमेडी चित्रपट आहे. हा चित्रपट चित्रपटगृहांमध्ये नाही तर ओटीटी प्लॅटफॉर्म अमेझॉन प्राइम व्हिडिओवर 2 जुलै रोजी स्ट्रीम होणार आहे. प्रियांका या चित्रपटात प्रमुख भूमिकेत आहे.
