सध्या बीसीसीआय १४ ते १६ वयोगटातील मुलांसाठी हाडांच्या चाचण्या घेत आहे. प्रचलित पद्धतीनुसार, एकदा खेळाडूचे हाडांचे वय निश्चित केले की, त्यात एक वर्ष जोडले जाते. हा समायोजित आकडा - ज्याला 'गणितीय वय' असेही म्हणतात - बीसीसीआय वयोगटातील स्पर्धांमध्ये पात्रतेसाठी अधिकृत वय म्हणून गणला जातो. उदाहरणार्थ, जर खेळाडूच्या हाडांचे वय १४.८ वर्षे असल्याचा वैद्यकीय अहवाल आला तर बीसीसीआय त्यात एक वर्ष जोडते आणि वय १५.८ असल्याचे निश्चित करते. हे वय १६ वर्षांखालील क्रिकेट स्पर्धेसाठी निश्चित केलेल्या अटींमध्ये बसते. यामुळे संबंधित खेळाडू १६ वर्षांखालील क्रिकेट स्पर्धेत खेळू शकतो. पुढील वर्षी, खेळाडू १६ वर्षांखालील श्रेणीसाठी आपोआप अपात्र ठरेल. तथापि, नवीन AVP मार्गदर्शक तत्त्वांनुसार, जर खेळाडू त्याच्या जन्म प्रमाणपत्रानुसार अजूनही १६ वर्षांखालील असेल, तर त्याला दुसऱ्यांदा हाडांची चाचणी करण्याची परवानगी दिली जाईल. दुसऱ्या चाचणीअंती वय १६ पेक्षा कमी असल्याचे निश्चित झाले तरच खेळाडू १६ वर्षांखालील स्पर्धेत खेळू शकेल, असे बीसीसीआयने जाहीर केले. हाच नियम १२ ते १५ वयोगटातील मुलगी क्रिकेटपटू यांच्यासाठी असेल.
हाडांची चाचणी प्रत्येकवेळी १०० टक्के अचूक असेल असे नाही. यामुळेच बीसीसीआयने हाडांच्या दोन चाचण्यांसाठी परवानगी दिली आहे. हाडांची चाचणी एक्स-रे द्वारे केली जाते. ही प्रक्रिया प्रत्येक घरगुती हंगाम सुरू होण्यापूर्वी, सामान्यतः जुलै आणि ऑगस्ट महिन्यात करतात. राज्य संघटनांना विशिष्ट वेळापत्रके दिली जातात आणि चाचण्या झाल्यावर बीसीसीआयचा एक प्रतिनिधी प्रत्येक राज्याला भेट देतो. प्रत्येक राज्यात सुमारे ४०-५० मुले आणि २०-२५ मुली चाचण्यांसाठी उपस्थित राहतात. चाचण्यांच्यावेळी तोतया मुलांना आणण्याचे प्रकार टाळण्यासाठी आता खेळाडूचा अलिकडेच काढलेला रंगीत फोटो आणि त्याचे आधार कार्ड सोबत आणणे बंधनकारक करण्यात आले आहे.
