शहापूर : जगातील सर्वात कठीण ‘अल्ट्रा मॅराथॉन कॉमरेड्स मॅराथॉन’ अंतर ९० कि.मी. साऊथ आफ्रिका या देशातील डर्बन ते पीटर्समार्गबर्ग शहरांमध्ये घेण्यात येते. या वर्षी सदर कॉमरेड मॅराथॉन स्पर्धा दिनांक ८ जून रोजी पार पडली. ही स्पर्धा सलग दोन वर्षं यशस्वीरित्या पूर्ण करून ठाणे वनवृत्तातील शहापूर वनविभागात वनपरिक्षेत्र अधिकारी वाशाळा या पदावर कार्यरत असलेले विशाल विठ्ठल गोदडे यांनी नवा विक्रम नोंदविला आहे.
असा विक्रम करणारे ते भारतीय वनविभागातील पहिलेच अधिकारी ठरले आहेत. सदरची स्पर्धा त्यांनी ११ तास ३२ मिनिटे एवढया वेळात पूर्ण केली आहे. तसेच गेल्या वर्षी ९ जून २०२४ रोजी ही स्पर्धा त्यांनी ११ तास ३५ मिनिटे एवढया वेळात पूर्ण केली होती. त्यासाठी त्यांना विशेष पदक प्राप्त झाले आहे.
यापूर्वी मलेशिया या देशातील लंकावी या ठिकाणी दिनांक ५ नोव्हेंबर, २०२२ रोजी झालेल्या जगातील सर्वात कठीण एक दिवसीय ‘आयर्नमॅन’ या स्पर्धेत सहभागी होऊन सदर स्पर्धा १५ तास ४३ मिनिटांत पूर्ण करुन पहिल्याच प्रयत्नात ‘आयर्नमॅन’ हा जागतिक बहुमानाचा किताब देखील त्यांनी मिळविलेला आहे.
सदरचा किताब मिळवणारे भारतीय वन विभागातील ते पहिलेच अधिकारी आहेत. त्यानंतर १० सप्टेंबर, २०२३ रोजी जगातील समुद्रसपाटीपासुन सर्वात उंच ठिकाणी होणारी लडाख मॅराथॉन देखील त्यांनी यशस्वीरित्या पूर्ण केलेली आहे. हे यश प्राप्त करण्यासाठी त्यांची पत्नी पूजा गोदडे यांची त्याचप्रमाणे कोच अमित कुमार यांचे मार्गदर्शन मोलाचे ठरले आहे.
