इराण नव्याने तयार करत असलेल्या अण्वस्त्रांमुळे आमच्या सुरक्षेला धोका आहे, अशी भूमिका घेत इस्रायलने इराण विरुद्ध हवाई हल्ले सुरू केले आहेत. इस्रायलच्या हल्ल्यांना इराणकडून प्रत्युत्तर देणे सुरू आहे. इस्रायल प्रामुख्याने इराणची सैन्य शक्ती कमकुवत करण्याचा प्रयत्न करत आहे तर इराण इस्रायलमध्ये कधी नागरी वस्तीवर तर कधी सैन्याशी संबंधित आस्थापनांवर हल्ले करत आहे. इस्रायलने अली खमेनेई यांना ठार मारण्याचा धमकीवजा इशारा दिला आहे. याआधी इस्रायलने इराणच्या अनेक सैन्याधिकाऱ्यांना आणि गुप्तचर अधिकाऱ्यांना ठार केले आहे. या पार्श्वभूमीवर डोनाल्ड ट्रम्प यांची 'unconditional surrender' अर्थात 'बिनशर्त शरणागती' ही नवी सोशल मीडिया पोस्ट आली आहे.
इस्रायलने १७ - १८ जूनच्या रात्री इराणची राजधानी असलेल्या तेहरान तसेच इराणच्या लष्करीदृष्ट्या महत्त्वाच्या असलेल्या आस्थापनांना आणि सैन्य तळांना लक्ष्य करुन मोठ्या प्रमाणात हवाई हल्ले केले. या हल्ल्यांमुळे इराणमध्ये मोठ्या प्रमाणात जीवितहानी आणि वित्तहानी झाल्याचा अंदाज व्यक्त होत आहे. अधिकृत सरकारी माहिती अद्याप आलेली नाही. पण इराणवरील इस्रायलचे हल्ले तीव्र झाले आहेत. या पार्श्वभूमीवर ट्रम्प यांनी सोशल मीडिया पोस्ट केली.
"आम्हाला माहित आहे की तथाकथित 'सर्वोच्च नेता' कुठे लपला आहे. तो एक सोपे लक्ष्य आहे, परंतु तिथे सुरक्षित आहे - आम्ही त्याला बाहेर काढणार नाही (मारणार नाही!), किमान सध्या तरी नाही," असे ट्रम्प यांनी एका सोशल मीडिया पोस्टमध्ये नमूद केले. यानंतर अजून एक सोशल मीडिया पोस्ट टाकत त्यात ट्रम्प यांनी 'unconditional surrender' अर्थात 'बिनशर्त शरणागती' हे दोनच शब्द नमूद केले आहेत.